Muqtaj otbasynan shyqqan stýdentterdiń páter jaldaý shyǵynyn memleket óteýi múmkin

ASTANA. QazAqparat – Halyqtyń áleýmettik osal tobynan shyqqan stýdentterdiń páter jaldaý shyǵyndary ótelýi múmkin. Bul jaıynda Premer-Mınıstrdiń orynbasary Altaı Kólginovtiń Májilis depýtattary saýalyna bergen jaýabynda aıtylǵan, dep habarlaıdy QazAqparat tilshisi.

«Memleket basshysynyń tapsyrmasyn oryndaý aıasynda halyqtyń áleýmettik osal toptarynyń jekelegen sanattary qatarynan basqa qaladan kelgen stýdentterdiń jataqhanada turýǵa jumsalatyn shyǵynyn sýbsıdııalaý máselesi pysyqtalyp jatyr. Oqý-aǵartý, Ǵylym jáne joǵary bilim mınıstrlikteriniń derekteri boıynsha 2022-2023 oqý jylynda joǵary oqý oryndary men kolledjderde halyqtyń áleýmettik osal toptary sanatynan shamamen 218,5 myń stýdent (JOO-da 168,1 myń adam, kolledjderde 50,3 myń adam) oqyp júr. Osyǵan baılanysty úsh jyldyq bıýdjetke qosymsha qajettilik shamamen 54,7 mlrd teńgeni (JOO stýdentterine – 42 mlrd teńge, kolledjder – 12,7 mlrd teńge) quraıdy», - dep atap ótedi Úkimet basshysynyń orynbasary.

Sonymen qatar vıtse-premer stýdentterdiń páter jaldaýǵa jumsaıtyn shyǵyndaryn óteý úshin Oqý-aǵartý, Ǵylym jáne joǵary bilim mınıstrlikteri respýblıkalyq bıýdjettiń múmkindikterin eskere otyryp, memlekettik áleýmettik kómekke eń muqtaj eki sanatty anyqtaǵanyn aıtady.

«Olar - jetim jáne ata-anasynyń qamqorlyǵynsyz qalǵan stýdentter (1 846 adam), múgedektigi bar adamdar, bala kezinen múgedektigi bar adamdar, múgedektigi bar balalar (758 adam). Úsh jyldyq bıýdjetke qajettilik - shamamen 1,9 mlrd teńge», - dedi Altaı Kólginov.