Muqtaj otbasylarǵa aqsha jınaǵan alaıaq ustaldy
NUR-SULTAN. QazAqparat – Elordada muqtaj otbasylarǵa kómek kórsetý jeleýimen aqsha jınady degen kúdikpen 21 jastaǵy alaıaq boıjetken ustaldy, dep habarlaıdy QazAqparat tilshisi Polisia.kz-ke silteme jasap.
Kúdikti buǵan deıin QR Qylmystyq kodeksiniń 189-babymen qylmystyq jaýapkershilikke tartylǵan. Tergeý barysynda ustalǵan boıjetkenniń 2019 jyldyń qańtarynan beri ınternet jelisin paıdalanýshylarǵa qatysty birneshe ret alaıaqtyq jasaǵany belgili bolyp otyr. Máselen, ol Instagram áleýmettik jelisinde az qamtylǵan otbasylarǵa aqsha jınaý jáne qaıyrymdylyq kórsetý jeleýimen «komissionka_nursultan» dep atalatyn paraqsha ashqan. Atalǵan paraqshaǵa jazylǵandardyń biri boıjetkenniń áreketinen kúdiktengen.
«Muqtaj otbasylarǵa kómek kórsetýdi sheshken ol boıjetkenniń banktik kartasyna 20 500 teńge aqsha aýdarǵan. Zardap shegýshiniń aıtýynsha, biraz ýaqyt ótkennen keıin onyń áreketinen kúdiktene bastaǵan. Kómek kórsetý úshin muqtaj otbasylarmen kezdestirý ótinishine túrli syltaý aıtyp, keıinnen baılanysqa múldem shyqpaı qoıǵan. Ózin aldap ketkenin túsingen zardap shegýshi polıtsııaǵa júgingen», - delingen taratylǵan aqparatta.
Ustalǵan kúdikti alaıaqtyq jasaǵanyn moıyndap otyr. Qazirgi ýaqytta onyń ústinen QR QK 190-baby 2-bóligi boıynsha 10 epızodpen sotqa deıingi tergeý amaldary júrgizilip jatyr. Keltirilgen jalpy shyǵyn – 400 myń teńge.
Osyǵan oraı Nur-Sultan qalasynyń Polıtsııa departamenti atalǵan qyzdyń alaıaqtyq áreketinen zardap sheken azamattardy Beıbitshilik kóshesi, 19 mekenjaıyna kelýge nemese 8 (7172) 41-63-35, 71-67-08 telefon nómirlerine habarlasýǵa ótinish jasap otyr.
