Mýkovıstsıdoz boıynsha aımaqaralyq ortalyqtar ashylady
ASTANA. QazAqparat - Búgin Pedıatrııa jáne balalar hırýrgııasy ǵylymı ortalyǵynda «Mýkovıstsıdoz kezinde tynys alý joldaryn jattyqtyrý jáne tazalaý ádisteri» taqyrybynda trenıng bastaldy, dep habarlaıdy QazAqparat atalǵan ortalyqtyń baspasóz qyzmetine silteme jasap.
Shara Qazaqstan Respýblıkasynda balalardaǵy sırek aýrýlardy dıagnostıkalaý men emdeýdiń jańa standarttaryn engizý boıynsha 2017-2019 jyldarǵa arnalǵan Jol kartasy aıasynda uıymdastyryldy.
Kınezıterapııa boıynsha trenıngti Ulybrıtanııanyń «Greıt Ormond Strıt» balalar gospıtaliniń jetekshi mamandary Ammanı Prasad pen Helen Dýglas ótkizýde. 5 kúnge jalǵasatyn trenıng barysynda sheteldik mamandar mýkovıstsıdozǵa shaldyqqan naýqastarǵa kınezıterapııany qoldaný boıynsha qazaqstandyq dárigerler men meıirbıkelerge praktıkalyq oqytý dárisin júrgizedi.
«Trenıngke qatysýshy mamandar aldaǵy ýaqytta mýkovıstsıdozǵa shaldyqqan naýqas balalardyń ata-analaryn osy jattyǵýlarǵa úırete alatyn bolady. Osynda úırengen emdeý ádis-tásil túrlerin kórsete alady. Bilip úırengen kınezıterapııa daǵdylaryn tek qana mýkovıstsıdoz kezinde ǵana emes, sonymen qatar, bronh-ókpe júıesiniń basqa da aýrýlary kezinde qoldana alady. Búgingi kúni kınezıterapııa mýkovıstsıdozdy sátti emdeýdiń eń negizgi quraýshysynyń biri bolyp tabylady. Búgingi zamanǵy kınezıterapııa dári-dármekpen emdeý áserin aıtarlyqtaı arttyrady, sonymen qatar, fızıkalyq jumysqa qabilettiligin kóteredi, aýrýdyń aǵymyna oń yqpal ete otyryp mýkovıstsıdozǵa shaldyqqan naýqastardyń ómir sapasyn jaqsartady», - deıdi qazaqstandyq mýkovıstsıdoz qaýymdastyǵynyń tóraıymy Indıra Izbasarova.
Sharanyń ashylýynda Pedıatrııa jáne balalar hırýrgııasy ǵylymı ortalyǵynyń basshysy Rıza Boranbaeva kınezıterapııa boıynsha trenıng pýlmonologııalyq jaǵdaıdyń jaqsartatynyn jáne bizdiń elimizdegi kúrdeli aýrýdy emdeýdi jaqsartýda taǵy da bir qadam jasaýǵa múmkindik beretindigin atap ótti.
«Densaýlyq saqtaý mınıstrligi sırek aýrýlarǵa erekshe nazar aýdarady. Onyń ishinde gendik aýrýlarǵa jatatyn mýkovıstsıdoz máselesine kóńil bólemiz. Gendik aýrýlardy anyqtaý, dıagnostıkalaý jyldan-jylǵa jaqsaryp keledi. Sırek aýrýlaryna kóbine Almaty, Astana, ShQO, OQO, Almaty, Pavlodar jáne Jambyl oblystarynda anyqtalýda. Ókinishke oraı, mýkovıstsıdoz emdelmeıtin aýrý. Sonyń sebebinen, kishkentaı patsıentter eresek jasqa jetpeı ómirden ótedi. Sondyqtan, bizdiń aldyǵa qoıyp otyrǵan maqsatymyz - AQSh, Eýropa elderindegideı kishkentaı naýqas balalardyń ómir súrý uzaqtyǵyn 50 jasqa deıin jetkizý. Sonymen qatar, mýkovıstsıdozǵa shaldyqqan balalardy ońaltý laıyqty deńgeıde emestigi mańyzdy máselelerdiń biri bolyp otyr. Dári-dármektermen emdeýden bólek, ońaltý kezeńi, onyń ishinde kınezıterapııany jolǵa qoıý mańyzdy. Atap óterlik jaıt, 2011 jyldan bastap mýkovıstsıdozǵa shaldyqqan balalarǵa respýblıkalyq bıýdjet esebinen dári-dármekter tegin berilip keledi. Bul qyzmetti damytýda birqatar normatıvtik qujattar ázirlendi. Mýkovıstsıdoz boıynsha aımaqaralyq ortalyqtar ashylady. Búgingi shara bul salanyń damýyna yqpal etedi dep senemin», - dedi QR DSM Medıtsınalyq kómekti uıymdastyrý departamentiniń Ana men bala densaýlyǵyn saqtaý basqarmasynyń jetekshisi Janar Sadýova. 
Búgingi kúni Qazaqstanda resmı túrde mýkovıstsıdozǵa shaldyqqan 105 naýqas tirkelgen. Mýkovıstsıdoz saldarynan tynys alý, as qorytý júıesi, sonymen qatar ishki sekretsııa bezderi zaqymdanady. Ókpede jabysqaq qaqyryqtyń jınaqtalýynan qaıtalanatyn bronhıt pen pnevmonııa týǵyzatyn qabynbaly úderis damıdy. Aýrýdyń basty belgileriniń biri - azapty jótel týyndaıdy. Naq osy tynys alý jetkiliksizdiginen mýkovıstsıdozǵa shaldyqqan naýqastardyń basym bóligi qaza bolady.
Mamandardyń aıtýynsha, mýkovıstsıdoz - dárilik preparattar men kınezıterapııany ómir boıyna qoldanýdy qajet etetin aýrý. Qazirgi kınezıterapııa dári-dármekpen emdeý áserin aıtarlyqtaı arttyrady, ókpedegi gaz almasýyn jaqsartyp, fızıkalyq jumysqa qabilettiligin kóteredi, aýrýdyń aǵymyna oń yqpal ete otyryp mýkovıstsıdozǵa shaldyqqan naýqastardyń ómirin uzartady.
Kınezıterapııa - dene shynyqtyrý arqyly emdeýdiń biri baǵyty. Grektiń kinesis - «qozǵalys» + terapııa - «emdeý» sózinen shyqqan, ıaǵnı qozǵalys arqyly emdeý degendi bildiredi. Bul terapııaǵa dene shynyqtyrý jattyǵýlarymen qatar, massajdyń barlyq túri, balalar oıyndary, sozylý ádisteri, arnaıy apparattarda jattyǵýlar arqyly emdeý, tynys alý, emdik gımnastıkasy, sylap-sıpaý jáne t.b. emdeý túrleri kiredi. Kınezıterapııa emdeý tásili dárigerdiń qatań tikeleı baqylaýymen júrgizilýi kerek.
