«Muqyr-Qulsary» jolyn jóndeýge tsıfrlyq teńge paıdalanylady

ATYRAÝ. KAZINFORM — Atyraý oblysyndaǵy «Muqyr-Qulsary» jolyn jóndeý qarjysy — 2,1 mlrd teńge. Mamyr aıynda bastalatyn jobaǵa bólingen qarjynyń 100 mln teńgesi tańbalanǵan.

Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń birinshi orynbasary Nurlan Jahınniń málimetinshe, atalǵan joldy ortasha jóndeý qurylysynda tsıfrlyq teńgeni paıdalaný jónindegi pılottyq joba iske qosylǵan. Bul joldy jóndeýge «QazAvtoJol» UK» AQ tapsyrys bergen. Al merdiger — «Atyraýınjstroı-AIS» JShS.

— Jobanyń baǵasy 2 mlrd teńgeden asady. Qarjynyń 100 mln teńgesi tsıfrlyq belgimen tańbalandy. Bul soma ulttyq valıýtaǵa aıyrbastaldy. Shartqa sáıkes qurylys materıaldaryn jetkizetin «Naqzat» JShS-ǵa aýdaryldy, — dep málim etti Nurlan Jahın.

Foto: Sybaılas jemqorlyqqa qarsy is-qımyl agenttiginiń Atyraý oblystyq departamenti

Al qurylys materıaldaryn temirjolmen Muqyr stantsııasyna jetkizý kózdelgen. Osy aıda stansaǵa 45 vagonǵa tıelgen materıaldar jetkiziledi.

Qazir bul stansada 30 vagonǵa arnalǵan temirjol tuıyǵy, jumys kúshi, arnaıy tehnıka bar. Materıaldardy túsirýge arnalǵan aýmaq jaryqtandyrylyp, qorshalǵan. Nysan qurylys tehnıkalarymen qamtamasyz etilgen.

— Shart 2024 jyldyń qarashasynda jasaldy. Onyń aıaqtalý merzimi 2025 jyldyń sońyna josparlanǵan. Jol qurylysy mamyr aıynda bastalady. «Zań men tártip» qaǵıdatyna sáıkes bul joba óńirlik departamenttiń baqylaýyna alyndy. Óıtkeni tsıfrlyq teńge platformasy bıýdjet shyǵysynyń ashyqtyǵyn qamtamasyz etedi. Pılottyq joba aıasynda bólingen qarjy tańbalanady. Bul materıaldardy jetkizýshiler men jumysty oryndaıtyn merdigerlerge deıingi barlyq kezeńde bıýdjet qarjysyn maqsatty paıdalanýǵa kepildik beredi. Eń bastysy sybaılas jemqorlyq qaýpiniń aldyn alady, — deıdi Nurlan Jahın.

Foto: Kazinform

Onyń pikirinshe, tańbalanǵan tsıfrlyq teńge tek kózdelgen mindettemelerdi oryndaýǵa jumsalady. Mundaı qarjyny qolma-qol aqshaǵa aınaldyrýǵa, ózge qajettilikterge qaıta baǵyttaýǵa jol berilmeıdi.

Eske sala ketelik, budan buryn Atyraýdaǵy Muqyr aýylynda mádenıet úıiniń qurylysyn júrgizetin merdiger úshinshi ret aýysqanyn habarlaǵan bolatynbyz.