Muqan Tólebaev atyndaǵy baıqaýdyń bas júldesi Astana men Qyzylordaǵa buıyrdy
TALDYQORǴAN. QazAqparat - Búgin Taldyqorǵanda Muqan Tólebaev atyndaǵy respýblıkalyq baıqaý máresine jetti. Vokalıst ánshiler men dırıjerlar baq synasqan dodada bas júldeni Astana qalasy men Qyzylorda oblysynyń ónerpazdary qanjyǵalady, dep habarlaıdy QazAqparat tilshisi.
«Altyn taıaqsha» dırıjerlar baıqaýynda Gran-prıdi astanalyq Ernar Nurtazın jeńip aldy.
«Meniń birinshi mamandyǵym pıanıst. Buǵan deıin fortepıanoda oınap, kóptegen baıqaýlardyń jeńimpazy atanǵanmyn. Al dırıjer ekinshi mamandyǵym. Dırıjerlyq qyrymnan baǵymdy osymen ekinshi ret synap turmyn. Alǵash ret Astana qalasynda ótken Nurǵısa Tilendıev atyndaǵy «Óz elim» baıqaýynda birinshi oryn aldym. Búgingi baıqaýda bas júlde buıyrdy. Sondyqtan men óz tańdaýymdy durys jasadym dep oılaımyn»,- deıdi 29 jastaǵy Ernar Nurtazın.
Al vokalıster arasynda ótken «Kesteli oramal» baıqaýynyń bas júldesi Qyzylordalyq Málik Azatqa buıyrdy. «Kesteli oramal» jáne «Altyn taıaqsha» baıqaýynyń Gran-prı ıegerleri arnaıy dıplommen marapattalyp, 600 myń teńgeden aqshalaı syılyqqa ıe boldy. Sondaı-aq vokalıster arasynda birinshi oryn astanalyq Tynyshtyq Shahrızadaǵa (júlde qory 400 myń teńge), ekinshi oryn almatylyq Jarmaǵambetov Rasýl jáne Ońtústik Qazaqstan oblysynyń turǵyny Jumabek Qańtarbaevqa (júlde qory 100 myń teńge), al úshinshi oryn pavlodarlyq Nursultan Sabırov, astanalyq Jadyra Abdýllaeva jáne Almaty oblysynyń turǵyny Jomart Takebaevqa buıyrdy. (júlde qory 50 myń teńge).
Al dırıjerlar arasynda birinshi oryndy Ońtústik Qazaqstan oblysynyń ónerpazy Qýanysh Ismaılov qanjyǵalady. Jeńimpaz arnaıy dıplommen marapattalyp, 400 myń teńgeniń aqshalaı syılyǵyna ıe boldy. Ekinshi oryn Almaty qalasynyń qos ónerpazy Madııar Toıboldıev pen Abylaı Tilepbergenovqa buıyrdy (júlde qory 100 myń teńge). Úshinshi oryndy mańǵystaýlyq Álibek Muratov pen almatylyq Aıdos Mendalıev jeńip aldy (júlde qory 50 myń teńge). Sondaı-aq baıqaýda 20 myń teńgeniń arnaıy júldesi bes adamǵa tabys etildi.
Aıta keteıik, Jetisýdyń týmasy, KSRO Halyq ártisi, kompozıtor Muqan Tólebaev atyndaǵy respýblıkalyq baıqaý osymen 4-shi ret uıymdastyrylyp otyr. Vokalıst ánshiler men dırıjerlar baq synasqan dodada elimizdiń túkpir-túkpirinen 40-qa jýyq ónerpaz qatysty. Sharanyń basty maqsaty úlken orkestrdi basqaratyn dırıjerlardy iriktep, olardy jan-jaqty demeý. Sondaı-aq osyndaı orkestrdiń súıemeldeýimen oryndaıtyn ánshilerge jiger berý.
Almaty oblysy ákiminiń tikeleı qoldaýymen ótip jatqan baıqaýdyń deńgeıi jyldan-jylǵa artyp keledi deıdi, uıymdastyrýshylar. Bul joly ónerpazdardy baǵalaıtyn qazylar alqasyna halyqaralyq deńgeıdegi bilikti mamandar shaqyryldy. Qazylar alqasynyń músheliginde Ózbekstan Respýblıkasynyń halyq ártisi, professor, dırıjer Farýh Sydyqov, QR Eńbek sińirgen qaıratkeri, professor, dırıjer Álı Alpysbaev jáne QR Eńbek sińirgen qaıratkeri, professor Azamat Jyltyrkózov syndy mýzyka salasynyń maıtalmandary bar.
