Muqaǵalı Maqataevtyń shyǵarmalary qytaı tilinde 1 mıllıon danamen basylyp shyqty
ALMATY. 27 qyrkúıek. QazAqparat /Erlik Erjanuly/ - Muqaǵalı Maqataevtyń shyǵarmalary Qaısha Tábiriktiń aýdarmasymen qytaı tilinde jeke kitap bolyp jaryq kórdi. Bul jaıynda QazAqparat tilshisine bergen suhbatynda aqynnyń uly - Juldyz Maqataev aıtty.
"Bıyl 29-30 shilde kúnderi Almaty oblysy Raıymbek aýdany Qarasaz aýylynda Muqaǵalı Maqataevtyń 80 jyldyq mereıtoıy ótken bolatyn. Onda «Jahandaný jáne Maqataev álemi» dep atalatyn ǵylymı-tájirıbelik konferentsııa kezinde súıinishti habarmen qýantqan edi. Endi qytaı tilindegi bul kitaptyń 1 mıllıon danamen shyqqany belgili bolyp otyr", - deıdi Juldyz Maqataev.
Onyń aıtýynsha, mereıtoı kezinde Muqaǵalı shyǵarmalaryna arnalǵan on shaqty jańa kitap jaryq kórdi. Olardyń arasynda shyǵarmalar jınaqtary men estelikter de bar. Sondaı-aq jaqynda búkil shyǵarmalarynyń 100 baspa tabaq bolatyn tolyq jınaǵy jaryq kórdi. Sondaı-aq kórshi Qytaıda ádebı-poetıkalyq kesh ótti. Endi mundaı sharany QR Mádenıet mınıstrligi Astana qalasynda da uıymdastyrǵaly otyr.
