Muqaǵalı Maqataevty eske túsirýge arnalǵan dástúrli «Búgin meniń týǵan kúnim» keshi bıyl Taldyqorǵanda ótedi
ALMATY. Qańtardyń 30-y. QazAqparat /Erlik Erjanuly/ - Asqar Naımantaevtyń jobasy boıynsha jyl saıyn aqpannyń 9-y kúni Almatydaǵy Respýblıka saraıynda ótetin Muqaǵalı Maqatevtyń týǵan kúnine arnalǵan «Búgin meniń týǵan kúnim» dep atalatyn dástúrli shara bıyl Taldyqorǵan qalasynda ótedi,
dep habarlaıdy QazAqparat.
«Bıken Rımova atyndaǵy oblystyq drama teatry byltyr aqynnyń «Raıymbek, Raıymbek» poemasyn sahnalaǵan bolatyn. Qazaqstannyń eńbek sińirgen artısi Murat Ahmanov qoıǵan bul shyǵarma Qaraǵandy qalasynda ótken respýblıkalyq teatrlar baıqaýynda úlken júldege ıe bolyp qaıtqan edi. Teatr ujymynyń ótinishi boıynsha Muqaǵalı Maqataevtyń týǵan kúnine arnalǵan «Búgin meniń týǵan kúnim» jobasy bıyl osy óner ordasynyń ǵımaratynda ótetin boldy», deıdi sharanyń uıymdastyrýshy, rejısser Asqar Naımantaev. Onyń aıtýynsha, keshtiń birinshi bóliminde «Raıymbek, Raıymbek!» qoıylymy kórsetilip, ekinshi bólimi poezııa men án keshine jalǵasady. Onda dástúr boıynsha bıyl da jańa ánder, jańa esimder jaryqqa shyǵady.
