«Muqaǵalı» kórkem fılmi kúzde kórsetilýi múmkin
«Búgin qazaqtyń aqıyq aqyny Muqaǵalı Maqataevtyń týǵanyna - 90 jyl. Belgili rejısser Bolat Qalymbetovtiń fılmine onyń qıly taǵdyry men maǵynaly ǵumyry negiz boldy. Nebári 45 jyl ǵumyrynda ólmes óleń jazyp, óshpes iz qaldyrǵan aqyn tirisinde laıyqty baǵasyn almady. Alaıda ómirin shyǵarmashylyqqa arnaǵan aqyn eshqashan moıyǵan emes.
«Qazaqfılm» kınostýdııasy túsirgen «Muqaǵalı» fılminiń tusaýkeseri pandemııaǵa baılanysty keıinge shegerilýde, biraq osy kúzde kórermender bul fılmdi úlken ekranda kóredi dep úmittenemiz», - dep jazylǵan kınostýdııanyń Facebook paraqshasynda.
Eske sala keteıik, fılmniń túsirilim jumystary ótken jyldyń maýsym aıynda bastalǵan. Negizgi epızodtar Almaty oblysy men Almaty, Óskemen qalalarynda jáne Sankt-Peterbýrgte túsirildi. Kartınaǵa aqyn ómiriniń sońǵy jyldary arqaý bolǵan.
Muqaǵalı Maqataev – qazaqtyń lırık aqyny. Az ǵumyrynda birneshe lırıkalyq jyr jınaǵy men dastandary jaryq kórgen. Aýdarma salasynda Shekspırdiń sonetterin, Danteniń «Qudiretti komedııasyn» qazaqshalady. Aqynnyń «Sarjaılaý», «Sónbeıdi áje, shyraǵyń», «Kel, erkem, Alataýyńa» óleńderine sazger Nurǵısa Tilendıev án shyǵarǵan.
Muqaǵalı Maqataev 1931 jyly 9 aqpanda Almaty oblysy qazirgi Raıymbek aýdanynyń Qarasaz aýylynda dúnıege kelip, 1976 jyldyń 27 naýryzynda Almatyda dúnıeden ótken.
