«Muqaǵalı» halyqaralyq kınofestıvalde birden bes júldeni jeńip aldy

ALMATY. QazAqparat – Belgili kınorejısser Bolat Qalymbetovtyń «Muqaǵalı» kórkem fılmi Shotlandııada ótken halyqaralyq Sent-Endrıýs kınofestıvalinde bes júldeni jeńip aldy, dep habarlaıdy QazAqparat tilshisi.

Sh. Aımanov atyndaǵy «Qazaqfılm» kınostýdııasynyń baspasóz qyzmeti málim etkendeı, Sent-Endrıýs kınofestıvalinde «Muqaǵalı» kórkem fılmi birden bes júldege ıe boldy. Atap aıtar bolsaq, gran-prı, úzdik kınodramatýrg, úzdik kınorejısser, úzdik operator jáne úzdik akter atalymdaryna laıyq tanyldy.

«Muqaǵalı» kórkem fılmi bir jylda 10 halyqaralyq syılyqqa ıe boldy. Bul – buryn-sońdy bolmaǵan óte qýanyshty jańalyq. Barsha qazaq kınosyn qadirleıtin kórermenderge alǵysymdy bildiremin. Qazaqtyń uly aqynyn ulyqtaǵan fılm jastarǵa tek shabyt bersin, Muqaǵalı atamyzdyń ónerin darytsyn dep tilegim keledi. Táýelsizdik kúni qarsańynda álemniń beldi synshylary óz baǵasyn bergen bul júldeler – qazaq halqynyń ortaq jeńisi», - dedi fılmniń rejısseri Bolat Qalymbetov.

Mádenıet jáne sport mınıstrliginiń tapsyrysy boıynsha Sháken Aımanov atyndaǵy «Qazaqfılm» kınostýdııasy túsirgen týyndyda aty ańyzǵa aınalǵan qazaq aqyny Muqaǵalı Maqataevtyń ómiriniń sońǵy jyldary týraly baıandalady.

Qazaqstanda fılm 2021 jyldyń 21 qazanynda prokatqa shyqqan bolatyn. Álemdik premerasy 25-shi (PÖFF) Tallın kınofestıvali aıasynda ótti, onda qazaqstandyq kartına ekýmenıkalyq qazylar alqasynyń júldesine ıe boldy.

Bıyl naýryz aıynda bıografııalyq kartına Keraladaǵy (Úndistan) 26-shy Halyqaralyq kınofestıvaldiń «Álemdik kıno» sektsııasynda usynyldy.

Qyrkúıek aıynyń basynda Qazan kınofestıvalinde qazylar alqasynyń arnaıy júldesine ıe boldy.

Qazan aıynda fılm Dýbaıdaǵy Meta Film Fest kınofestıvalinde Bas júldege ıe boldy.

Foto: kazakhfilmstudios.kz