«Muqaǵalı ǵasyrlarmen birge jańaryp, keler urpaqpen birge jasaı beredi» -respýblıkalyq basylymdarǵa sholý
***
«Keshe Qazaqstan Respýblıkasynyń Syrtqy ister mınıstri Erjan Qazyhanov Norvegııa Koroldiginiń elshisi Dag Malmer Halvorsendi qabyldady», - dep jazady «Egemen Qazaqstan» gazeti. Basylymnyń atap ótýinshe, kezdesý barysynda E.Qazyhanov Qazaqstan ekstremızm men lańkestiktiń kez kelgen túrin qatty synǵa alatynyn ataı otyryp, osy kúnderi Qazaqstan halqy Norvegııa halqynyń qasynda jáne Qazaqstan osy jyldardyń barlyǵynda ekstremızm men lańkestikpen kúres jónindegi halyqaralyq sharalardyń belsendi jáne mańyzdy qatysýshysy bolyp kelgenin basa aıtqan.
Elimizdegi kún sanap kóbeıip otyrǵan jumyssyz adamdardyń sany azaıatyn kún de alys emes. Memleket basshysy óz Joldaýynda Qazaqstan halqynyń ómir súrý sapasyn arttyrý jóninde Úkimetke birqatar naqty tapsyrmalar bere kele, halyqty jumyspen qamtýdyń túbegeıli jańa strategııasyn ázirleý mindetin júktegen bolatyn. Kemel keleshektiń kiltine aınalar «Jumyspen qamtý-2020» baǵdarlamasy boıynsha elimizde 1,5 mln. qazaqstandyq jumyspen qamtylyp, kedeılik kórsetkishi 6 paıyzǵa deıin azaıtylady. Baǵdarlama jaıynda egjeı-tegjeıli bilgińiz kelse, «Egemen Qazaqstan» gazetindegi «Jumyspen qamtý baǵdarlamasy - keleshek kilti» degen maqalaǵa kóz júgirtińiz.
***
«Elimizdegi sýdıalarǵa qoıylatyn talap qataıa tústi. Sol talapqa jaýap bere almaǵan 36 sýdıa osy jyly Elbasy Jarlyǵymen jumysynan bosatylǵan bolatyn. Al aldaǵy on kúnde olardyń qataryna 52 sýdıa qosylýy múmkin. Bul týraly keshe qyzmetine kiriskenine 100 kún tolǵanda, BAQ ókilderine arnap baspasóz-máslıhatyn ótkizgen Joǵarǵy Sottyń tóraǵasy Bektas Beknazarov habarlady», - dep jazady «Aıqyn» gazeti búgingi nómirindegi «52 sýdıa qyzmetinen bosaýy múmkin» degen taqyryptaǵy maqalasynda. Basylymnyń atap ótýinshe, budan bólek, 2010 jyldyń 1 qarashadaǵy Elbasy jarlyǵyna saı, 71 sýdıa qyzmetinen ketip, 114 sýdıa otstavkaǵa shyqqan.
Jahandyq daǵdarys jaılaǵanda, qazaqtyń aýyl sharýashylyǵy eńsesinen jel soqsa da teńselmes qara nardaı ilgeri jyljyp, joǵary damý nátıjelerin kórsetip, eldi tańǵaldyrǵany bar. Áıtse de, onyń ósý qarqyny el basshylyǵynyń kóńilinen shyqpaı otyr. Sondyqtan aýyl, sonyń ishinde, ásirese, mal sharýashylyǵynyń aldyna Elbasy N.Nazarbaev budan da zor mindet qoıýda. Jalpy, salanyń qazirgi jaǵdaıy neshik? Jetistikteri qandaı? Bul saýaldarǵa Úkimet búgin Astanada ótetin ІІ Halyqaralyq «Kaz Meat & Milk-2011» atty forýmda jaýap izdep kórmek. Al «Aıqyn» gazetiniń oqyrmany búgingi nómirdegi «Qaraótkeldiń» qadirin bile bastadyq» degen maqaladan jármeńke jáne elimizdiń mal sharýashylyǵy jaıynda keń maǵlumat ala alady.
***
Muqaǵalı Maqataevtyń 80 jyldyq mereıtoıyna oraı shyǵarylǵan «Alash aınasy» gazetiniń búgingi sanynan aqyn ómirine qatysty maqalalar toptamasyn oqýǵa bolady. Máselen, basylymnyń turaqty «Dat!» aıdarynda aqyn, fılologııa ǵylymynyń doktory, professor Sársenbi Dáýitovpen aradaǵy suhbat «Muqaǵalı ǵasyrlarmen birge jańaryp, keler urpaqpen birge jasaı beredi» degen taqyryppen berilgen. Basylym tilshisiniń Muqaǵalı ómirine qatysty barlyq saýaldaryna tuşymdy jaýap bergen ol: «Ol adaldyq pen ádildikti, birlikti jyrlady. Adamzat balasy bir-birine jamandyq jasamasa eken dedi. Otandy, mahabatty dáriptedi. Ómirdiń jasapazdyǵyn, memlekettikti, kisilik pen kishilikti tý etti», - deıdi.
***
«Kazahstanskaıa pravda» gazetiniń jazýynsha, keshe Premer-Mınıstr Kárim Másimov oblys ákimderi men ulttyq kompanııalar basshylarynyń qatysýymen ósimdik sharýashylyǵy salasyna memlekettik qoldaý kórsetý máseleleri jóninde selektorlyq keńes ótkizdi. Keńes barysynda, basymdyqqa ıe aýylsharýashylyq daqyldary óndirisin sýbsıdııalaý máselesi talqylanyp, sol sııaqty ósimdik sharýashylyǵy salasyna memlekettik qoldaý kórsetýdiń jańa formalary qaraldy. Sonymen qatar Premer-Mınıstr Mıchýrın kentindegi sportshylar men temirjolshylarǵa arnalǵan reabılıtatsııalyq ortalyqta boldy.
