«Muqaǵalı» fılmi ShYU elderi kınofestıvaliniń konkýrstyq baǵdarlamasyna endi
ALMATY. QazAqparat – «Muqaǵalı» kórkem fılmi Shanhaı yntymaqtastyq uıymyna (ShYU) múshe elderi kınofestıvaliniń konkýrstyq baǵdarlamasyna iriktelip alyndy, dep habarlaıdy QazAqparat tilshisi.
Sh.Aımanov atyndaǵy «Qazaqfılm» kınostýdııasynyń málimetinshe, rejısser Bolat Qalymbetovtyń «Muqaǵalı» fılmi 27-31 qańtar aralyǵynda Mýmbaı qalasynda ótetin Shanhaı yntymaqtastyq uıymyna (ShYU) múshe elder kınofestıvaliniń «Úzdik rejısser» nomınatsııasy boıynsha konkýrstyq baǵdarlamaǵa engizildi.
«Kınofestıval irikteýine qoıýshy-rejısser B.Qalymbetovtyń - «Muqaǵalı», qoıýshy-rejısser A. Sataevtyń - «Uly dala tańy», qoıýshy-rejısser A. Erjanovtyń «Ademokany oqytý», rejısser A. Anartaevtyń «Ystyq kól» fılmderi jiberilgen bolatyn», - dep habarlady kınostýdııadan.
Eske salaıyq, «Muqaǵalı» kórkem fılmi buǵan deıin Qazan kınofestıvalinde qazylar alqasynyń arnaıy syılyǵyna ıe boldy.
Dýbaıdaǵy Meta Film Fest kınofestıvalinde bas júldege ıe boldy.
Sondaı-aq Shotlandııada ótken halyqaralyq Sent-Endrıýs kınofestıvalinde bes júldeni jeńip alǵan bolatyn.
