«Muqaǵalı» fılmi Qazanda ótetin musylman kınosy festıvaline qatysady

ALMATY. QazAqparat- Belgili rejısser Bolat Qalymbetovtyń «Muqaǵalı» fılmi 7-11 qyrkúıek aralyǵynda Qazan qalasynda ótetin XVIII Halyqaralyq musylman kınosy kınofestıvaliniń negizgi baıqaýyna qatysady, dep habarlaıdy QazAqparat tilshisi.

Tatarstanda ótetin Qazan kınofestıvaliniń irikteý komıssııasy tóraǵasy Nına Kochelıaevanyń aıtýynsha, bıyl baıqaýǵa qatysýǵa birneshe memleketten ótinim kelip túsken.

Nátıjesinde negizgi tolyqmetrajdy fılmder baıqaýyna 10 fılm iriktelip alyndy, onyń ishinde Túrkııa, Qazaqstan, Úndistan, Iran, Bangladesh, Reseı, Mysyr, Shrı-Lanka memleketteriniń týyndylary, sondaı-aq eki el birlesip túsirilgen 2 týyndy bar.

Jalpy bıyl 44 elden 625 ótinim túsken.

Sonymen qatar, Qazan kınofestıvali sheńberine ekinshi ret kıno naryq uıymdastyrylyp, daryndy kınogerlerge ózderiniń jobalaryn iske asyrýǵa múmkindik beretin halyqaralyq pıtchıng (stsenarııler baıqaýy) ótkiziledi.

Aıta keteıik, QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen kınotýyndy qazaqtyń aqıyq aqyny Muqaǵalı Maqataev ómiriniń sońǵy jyldary týraly baıandaıdy.

Buǵan deıin fılm Tallındegi «A» sanatyndaǵy 25-shi halyqaralyq «Qarańǵy túnder» kınofestıvalinde kórsetilip, qazylar alqasynyń arnaıy júldesine ıe bolǵan.

Bıyl naýryz aıynda atalǵan fılm Úndistandaǵy halyqaralyq Kerala festıvali aıasynda kórsetilgen bolatyn.

Foto: kazakhfilmstudios.kz