Muhtar Tólegen: Parlamenttik saılaý standartty emes sheshim qabyldaıtyn kóshbasshy jastardy irikteıdi
Bul týraly ol Óskemen qalasynda ótken «Saılaý-2021: mańyzy men erekshelikteri» atty sarapshylar keńesiniń otyrysynda málim etti.
«Jańa saılaý naýqany bastalǵanǵa deıin elimizdiń qoǵamdyq-saıası ómirine barlyq sanattaǵy azamattardyń qatysýyn arttyrý boıynsha sharalar qabyldandy. Bul proportsıonaldy model álemdik demokratııalyq tájirıbege tolyq sáıkes keledi, saıası júıeni nyǵaıtýǵa, demokratııany damytýǵa yqpal etedi, saıası partııalardyń qyzmetin jandandyrady. Aldaǵy saılaý osyǵan deıingilerdiń barlyǵynan erekshe. Onyń ereksheligi, úgit-nasıhatqa deıingi uzaq kezeń, ıaǵnı 51 kún», - dedi Muhtar Tólegen.
Onyń aıtýynsha, sonyń arqasynda partııalarǵa uzaq ýaqyt boıy saılaý naýqanyna daıyndalýǵa múmkindik jasaldy.
«Saıası partııalar úgit-nasıhatqa deıingi ýaqytty tıimdi jáne kreatıvti túrde ótkizýge tyrysty. Qazaqstan Respýblıkasynyń saılaý týraly Konstıtýtsııalyq zańynda alǵash ret Parlament Májilisi depýtattarynyń saılaýynda áıelder men jastarǵa 30 paıyzdyq kvota bekitildi. Bul norma názik jandylar men óskeleń urpaqty bılik organdaryna tartýdyń tıimdi tetigi bolyp otyr. Nátıjesinde standartty emes sheshim qabyldaıtyn kóshbasshy jastar iriktelmek», - dedi ShQMÝ rektory.
