Muhtar Tinekeev «Arselor Mıttal Temirtaý» týraly: Shahterler reseılik ınvestor kelgenin qalamaıdy

Qazaqstan kásipodaqtar federatsııasy tóraǵasynyń orynbasary Muhtar Tinekeev «Arselor Mıttal Temirtaý» kompanııasynyń ornyna jańa ınvestor tartý máselesi týraly pikir bildirdi, dep habarlaıdy QazAqparat tilshisi. 

«Reseılik kompanııa keledi degen qaýeset shyqqan kezde (Severstal - red.), sizderge shyndyqty aıtaıyn, shahterler senbeıtinin bildirdi. Olar aılyqty bir aıda eki bólip alyp úırenip qalǵan. Avans pen qalǵan aılyqty alady. Al keletin ınvestordyń áreketi qalaı bolatyny belgisiz», - dedi ol Eńbek kúnine arnalǵan forým barysynda BAQ ókilderine bergen suhbatynda.

Onyń aıtýynsha, kenshiler qazirgi ınvestorǵa tıesili 8 shahtanyń bári jumys istep turǵanyn qalaıdy.

«Odan keıin kenshiler kelgen ınvestor 8 shahtanyń bárin saqtap qala ma degenge alańdap otyr. Qalǵandaryn qysqartyp, ekeýin ǵana qaldyrýy múmkin ǵoı. Onyń ústine ol jaqtyń sanktsııa astynda ekenin bilemiz. Óz metaldaryn erteń qazaqstandyq ónim retinde berip, óz elderinde balqytpaqshy ma? Shahterler arasynda osyndaı suraqtar týyndap tur. Al eń bastysy – taǵy da qaıtalap aıtaıyn, qazirgi ınvestordan (Arselor Mıttal Temirtaý – red) qaýipsizdikke kóbirek aqsha bólýdi talap etý qajet», - dedi kásiopdaq ókili.