Muhtar Tileýberdi QR Syrtqy ister mınıstri bolyp taǵaıyndaldy

-Ol burynǵy atqarǵan laýazymynan bosatyldy, dep habarlady Aqordanyń baspasóz qyzmeti.  

Tileýberdi Muhtar Beskenuly 1968 jylǵy 30 maýsymda týylǵan. S.M. Kırov atyndaǵy Qazaq memlekettik ýnıversıtetiniń fılosofııa-ekonomıka fakýltetin bitirgen, M.V.Lomonosov atyndaǵy Máskeý memlekettik ýnıversıteti janyndaǵy Azııa jáne Afrıka ınstıtýtynda jáne Iense Ýnıversıteti (Koreı Respýblıkasy) janyndaǵy Tilder ınstıtýtynda tájirıbe alǵan. Oqýdy aıaqtaǵannan keıin Ál-Farabı atyndaǵy QazUÝ-diń fılosofııa tarıhy jáne qytaı fılologııasy kafedralarynda jumys istegen.

Dıplomatııalyq qyzmetin 1993 jyly attashe laýazymynan bastady. Ortalyq apparattaǵy jumys barysynda Azııa elderi basqarmasynyń úshinshi hatshysy, Azııa departamentiniń birinshi hatshysy, Ekijaqty yntymaqtastyq departamentiniń bólim bastyǵy qyzmetterin atqardy.

Shetelde Qazaqstannyń Koreı Respýblıkasyndaǵy Elshiliginde ekinshi hatshy jáne Izraıl Memleketindegi Elshiliginde keńesshi bolyp jumys istedi. QR Prezıdentiniń Ákimshiliginde Memlekettik hatshynyń syrtqy saıasat máseleler jónindegi keńesshisi laýazymynda jumys istedi.

2003 jyly Syrtqy ister vıtse-mınıstri bolyp taǵaıyndaldy.

2004 jyly elimizdiń Malaızııadaǵy Elshisi jáne 2005 jyldan bastap Indonezııa Respýblıkasy, Brýneı Darýssalam jáne Fılıppın Respýblıkasyndaǵy Elshisi qyzmetin qosa atqardy.

2009 jyly Qazaqstannyń Shveıtsarııa Konfederatsııasyndaǵy Elshisi bolyp taǵaıyndaldy jáne Lıhtenshteın Knıazdigi men Vatıkan Memleketinde Elshi qyzmetin qosa atqardy, sonymen qatar Jenevadaǵy BUU Bólimshesinde jáne basqa da halyqaralyq uıymdarda Qazaqstan Respýblıkasynyń Turaqty ókili boldy.

2015 jyly Qazaqstannyń Ierýsalımdik Áýlıe Ioann Egemendi Áskerı Gospıtalerler Ordeni janyndaǵy, Rodostaǵy jáne Maltadaǵy qosa atqarýshy Elshisi bolyp akkredıtteldi.

2016-2019 jyldary QR Syrtqy ister mınıstriniń Birinshi orynbasary bolǵan.

2019 jylǵy qyrkúıek aıynda QR Syrtqy ister mınıstri laýazymyna taǵaıyndaldy. Qazaqstannyń Aýstrııadaǵy Elshisi bolyp taǵaıyndalǵanǵa deıin 2021 jylǵy qańtardan bastap 2023 jylǵy sáýir aralyǵynda QR Premer-Mınıstriniń orynbasary – Syrtqy ister mınıstri qyzmetin atqardy.

2023 jyldan Qazaqstan Respýblıkasynyń Aýstrııa Respýblıkasyndaǵy Tótenshe jáne Ókiletti Elshisi, Qazaqstan Respýblıkasynyń Vena qalasyndaǵy halyqaralyq uıymdar janyndaǵy Turaqty ókili boldy.

Tótenshe jáne Ókiletti Elshi dıplomatııalyq dárejesine ıe. Aǵylshyn, koreı tilderin meńgergen.

Osyǵan deıin Rınat Muhametqalı QR Prezıdenti Ákimshiliginiń Jalpy bóliminiń meńgerýshisi laýazymyna taǵaıyndalǵan bolatyn.