Muhtar Tileýberdi BUU Bas Assambleıasynyń 81-sessııasynda sóz sóıledi
ASTANA. KAZINFORM – Qazaqstan Respýblıkasynyń Syrtqy ister mınıstri Muhtar Tileýberdi Birikken Ulttar Uıymy Bas Assambleıasynyń 81-sessııasynyń jalpy pikirsaıysynda sóz sóılep, halyqaralyq kún tártibiniń negizgi máseleleri boıynsha Qazaqstannyń kózqarasyn tanystyrdy jáne eldiń saıası ári ornyqty damý salasyndaǵy basymdyqtaryn belgiledi. Bul týraly SІM habarlady.
Sóz sóıleý barysynda syrtqy saıası vedomstvo basshysy Qazaqstanda jalǵasyp jatqan saıası reformalarǵa erekshe nazar aýdardy. Ol 2026 jylǵy jańa Konstıtýtsııada adam qadir-qasıetine, adamı kapıtaldy damytýǵa, bilimge, ınnovatsııalarǵa jáne ekologııalyq jaýapkershilikke basymdyq kúsheıtilgenin atap ótti.
Mınıstr sondaı-aq ótken aıda jańa Quryltaıǵa ótken saılaýdyń mańyzyn atap ótip, onyń qorytyndysy boıynsha Parlamentte qoǵamdyq kúshterdiń keń aýqymy ókildik etip otyrǵanyn, al áıelderdiń úlesi tarıhı eń joǵary kórsetkishke – 34%-ǵa jetkenin aıtty.
– Qazaqstan úshin kópjaqtylyq – senimdi nyǵaıtýdyń, ortaq sheshimder izdeýdiń jáne azamattarymyz ben bolashaq urpaq úshin naqty nátıjelerge qol jetkizýdiń negizgi quraly. Ol sondaı-aq elimizdiń uzaq merzimdi saıası transformatsııasynyń mańyzdy quramdas bóligi sanalady, – dedi M.Tileýberdi.
Sóz sóıleýde halyqaralyq qaýipsizdik pen qarýsyzdaný máselelerine jeke nazar aýdaryldy. SІM basshysy Qazaqstannyń ıadrolyq qarýsyzdanýdy jáne ıadrolyq derjavalar arasyndaǵy dıalogty qaıta jandandyrýdy qoldaıtyn dáıekti ustanymyn rastady, sondaı-aq Bıologııalyq qarý týraly konventsııany nyǵaıtý maqsatynda Halyqaralyq bıologııalyq qaýipsizdik agenttigin qurý jónindegi elimizdiń bastamasyn atap ótti.
Eldiń odan ári damýy týraly aıta kele, Mınıstr saıası jańǵyrý, ornyqty damý jáne qorshaǵan ortaǵa jaýapkershilikpen qaraý arasyndaǵy ózara baılanysty atap ótti. Qazaqstan qorshaǵan ortany qorǵaý, klımattyń ózgerýine qarsy kúres, bıoalýantúrlilikti saqtaý jáne sý qaýipsizdigin nyǵaıtý salalaryndaǵy halyqaralyq yntymaqtastyqty ilgeriletýdi jalǵastyrýǵa nıetti.
Osy turǵyda M.Tileýberdi Astanada ótken Óńirlik ekologııalyq sammıttiń qorytyndylaryna, Qazaqstan Prezıdentiniń 22 sáýirdi Halyqaralyq planetany kógaldandyrý kúni dep jarııalaý jónindegi bastamasyna, sondaı-aq ekologııalyq jaýapkershilik mádenıetin, azamattyq belsendilikti jáne qoǵamdyq ıgilikke uqypty qaraýdy qalyptastyrýǵa baǵyttalǵan «Taza Qazaqstan» jalpyulttyq bastamasyna toqtaldy.
Ornyqty damýdyń, azyq-túlik jáne energetıkalyq qaýipsizdiktiń, klımattyq ornyqtylyq pen beıbitshiliktiń negizgi faktorlarynyń biri retinde sý qaýipsizdigine erekshe nazar aýdaryldy. Osyǵan baılanysty Prezıdent Qasym-Jomart Toqaevtyń BUU aıasynda Halyqaralyq sý uıymyn qurý jónindegi bastamasy tanystyryldy. Atalǵan uıym sý resýrstaryn halyqaralyq deńgeıde basqarýdyń neǵurlym birtutas ári tıimdi júıesin qalyptastyrýǵa yqpal etýge baǵyttalǵan.
Sóziniń sońynda Mınıstr Qazaqstannyń kópjaqtylyq qaǵıdattaryna berik ekenin jáne beıbitshilik, qaýipsizdik pen ornyqty damý múddesinde BUU-ǵa múshe barlyq memlekettermen syndarly ózara is-qımyldy jalǵastyrýǵa daıyn ekenin rastady.
Eske sala ketsek, buǵan deıin Syrtqy ister mınıstri Muhtar Tileýberdi BUU Bas hatshysymen kezdesti.
