Muhtar Tileýberdi resmı saparmen Ispanııaǵa bardy
Vedomstvonyń málimetine sensek, sapar sheńberinde mınıstr Ispanııa Koroli Felıpe VI aýdentsııada bolyp, Ispanııa Senatynyń Tóraǵasy Pılar Ioppen kezdesý jáne Ispanııa Koroldiginiń Syrtqy ister, Eýropalyq odaq jáne yntymaqtastyq mınıstri Arancha Gonsales Laıamen kelissóz ótkizdi.
Korol Felıpe VI men kezdesýde taraptar eki el arasyndaǵy qatynastardyń strategııalyq sıpatyn rastady.
Nur-Sultan men Madrıd arasyndaǵy ózara tıimdi yntymaqtastyqty odan ári tereńdetýdiń, onyń ishinde joǵary deńgeıdegi saıası dıalogty nyǵaıtý turǵysynan perspektıvalar týraly jan-jaqty pikir almasty.
Atap aıtqanda, Korol Ispanııanyń Qazaqstanmen ózara is-qımyl deńgeıin joǵary baǵalady jáne Tuńǵysh Prezıdent - Elbasy Nursultan Nazarbaevqa onyń týǵan kúnine oraı jyly quttyqtaýlaryn jetkizdi.
Ispanııa SІM basshysy Arancha Gonsales Laıamen kelissóz barysynda saıası jáne saýda-ınvestıtsııalyq salalardaǵy ekijaqty yntymaqtastyqtyń keń aýqymdy máseleleri talqylandy.
Mınıstrler sondaı-aq BUU, EQYU jáne Eýropa Keńesi sııaqty halyqaralyq uıymdar men eýropalyq qurylymdar aıasyndaǵy ózara is-qımylǵa erekshe nazar aýdara otyryp, ózekti halyqaralyq máseleler boıynsha «saǵat teńestrdi».
Qazaqstan men Eýropalyq odaq arasyndaǵy keńeıtilgen áriptestik pen yntymaqtastyq týraly kelisimdi iske asyrýdyń mańyzy atap ótildi.
Sondaı-aq, kún tártibinde eki eldiń COVID-19 pandemııasynyń taralýy men saldarymen kúresý sharalary talqylandy.
Azamattardyń ózara saparlaryn jeńildetý jáne týrıstik saladaǵy yntymaqtastyqty damytý úshin Qazaqstan tarapy vaktsınatsııanyń ulttyq sertıfıkatyn ózara negizde taný múmkindigin qarastyrýdy usyndy.
Sonymen qatar, taraptardyń Qazaqstan men Ispanııa arasynda áýe qatynasy týraly kelisim jasasý jónindegi odan ári jumysqa múddeliligi rastaldy.
Kelissóz qorytyndysy boıynsha ǵylymı-tehnıkalyq yntymaqtastyq týraly úkimetaralyq kelisimge, aýyl sharýashylyǵy jáne qorshaǵan ortany qorǵaý salasyndaǵy ózara túsinistik týraly memorandýmdarǵa, sondaı-aq «KazAID» Qazaqstandyq halyqaralyq damý agenttigi men «AECID» Ispandyq damý maqsatyndaǵy halyqaralyq yntymaqtastyq agenttigi arasyndaǵy yntymaqtastyq týraly kelisimge qol qoıyldy.
Ispanııa Senatynyń Tóraǵasy Pılar Ioppen parlamentaralyq baılanystardy nyǵaıtý joldary talqylandy, onyń ishinde jańadan qurylatyn Qazaqstan-Ispan parlamentaralyq yntymaqtastyq tobynyń jelisi boıynsha.
Eki el Parlamentteriniń kópjaqty qurylymdar – Parlamentaralyq odaq, EQYU jáne Eýropa Keńesi Parlamenttik Assambleıalary jáne taǵy basqalar aıasyndaǵy ózara is-qımylyna erekshe kóńil bólindi.
Sonymen qatar, mınıstr M.Tileýberdi jetekshi ıspan kompanııalarymen «dóńgelek ústelge» qatysty.
Qazaqstan tarapymen ınvestıtsııalyq jobalar jáne olardy kólik ınfraqurylymy, jańartylatyn qýat kózderi, qorǵanys jáne aeroǵarysh ónerkásibi, agroónerkásiptik kompleks, farmatsevtıka, mashına jasaý, metallýrgııa jáne basqa salalarda iske asyrý múmkindikteri usynyldy.
Іs-sharaǵa 20-dan astam iri ıspandyq kompanııalardyń basshylary qatysty.
M.Tileýberdi sondaı-aq Ispanııanyń burynǵy Premer-mınıstri Hose Lýıs Sapateromen kezdesý ótkizip, «Airbus» kompanııasynyń óndiristik alańy men halyqaralyq trenıng ortalyǵyna bardy.
Ispanııa Qazaqstannyń iri saýda seriktesteriniń ondyǵyna kiredi.
Pandemııaǵa qaramastan, 2020 jyly Qazaqstan men Ispanııa arasyndaǵy taýar aınalymynyń kólemi 1,4 mlrd AQSh dollaryn qurady, al bıyl qańtar-mamyrda taýar aınalymy 80%-dan astamǵa ósip, 842 mln AQSh dollaryn (negizinen qazaqstandyq eksport esebinen) qurdy.
2005-2020 jyldar kezeńinde Ispanııadan Qazaqstanǵa tikeleı ınvestıtsııalar kólemi 245 mln. AQSh dollaryn qurady.
