Muhtar Tileýberdi: Majarstan – elimizdiń jaqyn odaqtasy

NUR-SULTAN. QazAqparat – Majarstan tarapymen Túrkitildes memleketterdiń yntymaqtastyǵy keńesiniń aıasyndaǵy is-áreketti odan ári keńeıtý jónindegi qadamdar talqylandy. Bul týraly Majarstan Syrtqy ekonomıkalyq baılanystar jáne syrtqy ister mınıstri Peter Sııartomen kelissózderden keıin QR Premer-Mınıstriniń orynbasary – Syrtqy ister mınıstri Muhtar Tileýberdi málim etti, dep habarlaıdy QazAqparat tilshisi.

«Búgin Majarstannyń Syrtqy ekonomıkalyq baılanystar jáne syrtqy ister mınıstri Peter Sııarto myrza resmı saparmen Qazaqstanǵa keldi. Majarstan – elimizdiń jaqyn odaqtasy, Ortalyq jáne Shyǵys Eýropa aımaǵyndaǵy elder ishinde bizben strategııalyq seriktestik ornatqan birden-bir memleket. Majar halqynyń bizben baýyrlas ekeni, qypshaqtarǵa qut meken bolǵany barlyqtaryńyzǵa belgili. Búgingi tańda Qazaqstan men Majarstan arasynda saıası nemese ózge sıpattaǵy qandaı da bir kelispeýshilikter joq. Halyqaralyq mańyzdy máseleler boıynsha ustanymdarymyz sáıkes keledi, elderimiz arasyndaǵy saıası dıalog joǵary deńgeıde. Majarstan Qazaqstannyń halyqaralyq arenadaǵy barlyq bastamalary men kúsh-jigerin qoldaıdy, bul ekijaqty ózara is-qımyldy odan ári damytý úshin qolaıly jaǵdaı jasaıdy», - dedi M. Tileýberdi.

Onyń aıtýynsha, Majarstan mınıstri Peter Sııarto myrzamen ashyqtyq pen ózara túsinistik rýhynda saıası, saýda-ekonomıkalyq jáne mádenı-gýmanıtarlyq salalardaǵy Qazaqstan-Majarstan baılanystaryn, sondaı-aq Túrkitildes memleketterdiń yntymaqtastyǵy keńesiniń (TMYK) aıasyndaǵy is-áreketti pandemııa jaǵdaıynda odan ári keńeıtý jónindegi qadamdar talqylandy.

«Qazaqstan men Majarstan is-qımyl jasap, kúsh-jigerin jumyldyratyn ózara múddeli halyqaralyq sıpattaǵy birqatar máseleler, onyń ishinde Qazaqstan azamattary úshin Eýropalyq Odaqtyń vızalyq rejımin jeńildetýge qatysty máseleler qaraldy», - dedi Muhtar Tileýberdi.

Budan buryn habarlanǵandaı, búgingi kelessiózderden keıin taraptar eki el arasyndaǵy birneshe qujatqa qol qoıdy.

Olardyń arasynda:

1. Damýǵa resmı kómek salasyndaǵy yntymaqtastyq boıynsha eki eldiń syrtqy saıası vedomstvolary arasyndaǵy ózara túsinistik týraly Memorandým;

2. Qazaqstan Respýblıkasynyń Syrtqy ister mınıstrligi janyndaǵy Syrtqy saıası zertteýler ınstıtýty men Majarstannyń Syrtqy ekonomıkalyq baılanystar jáne syrtqy ister ınstıtýty arasyndaǵy ózara túsinistik týraly Memorandým;

3. Qazaqstan Respýblıkasynyń Mádenıet jáne sport mınıstrligi men Majarstannyń Adamı resýrstar mınıstrligi arasyndaǵy 2021-2023 jyldarǵa arnalǵan mádenıet salasyndaǵy ózara yntymaqtastyq baǵdarlamasy bar.