Muhtar Tileýberdi qyrǵyz áriptesimen shekaradan ótý tártibin talqylady

MÁSKEÝ. QazAqparat – Búgin Shanhaı yntymaqtastyq uıymynyń Syrtqy ister mınıstrleri keńesiniń alańynda Qazaqstan Respýblıkasynyń Syrtqy ister mınıstri Muhtar Tileýberdi Qyrǵyzstan men Úndistan Respýblıkalarynyń Syrtqy ister mınıstrlerimen kezdesti, dep habarlaıdy QazAqparat.

«Chıngız Aıdarbekovpen qazaqstan-qyrǵyz kópjosparly yntymaqtastyǵynyń ózekti máseleleri, sondaı-aq asa joǵary jáne joǵary deńgeıdegi ekijaqty saparlardyń qorytyndylary boıynsha qol jetkizilgen ýaǵdalastyqtardy iske asyrý máseleleri talqylandy.

Memleketter arasyndaǵy kólik qatynasyn qalpyna keltirý jáne eki respýblıka azamattarynyń shekaradan ótý tártibi egjeı-tegjeıli qarastyryldy. Qyrǵyz tarapy Qazaqstanǵa koronavırýspen kúreste jáne qyrǵyz azamattaryn otanyna qaıtarý boıynsha birlesken jumysta kórsetken qoldaýy úshin erekshe rızashylyǵyn bildirdi», - dedi QR SІM-nen.

Málim etilgendeı, eki eldiń SІM basshylary halyqaralyq jáne óńirlik uıymdar aıasyndaǵy ózara is-qımyl máselelerin de qarastyrdy.

«Al Sýbramanıan Djaıshankar Qazaqstan men Úndistan arasyndaǵy saıası yntymaqtastyq pen joǵary deńgeıdegi saparlarmen almasýdyń joǵary serpinin atap ótti.

Taraptar elder arasyndaǵy 2020 jylǵy qańtar-mamyr aılaryndaǵy taýar aınalymy 1,57 mlrd AQSh dollaryn qurap, 2019 jyldyń osy kezeńimen salystyrǵanda eki ese óskenin rızashylyqpen atap ótti.

S.Djaıshankar energetıka, ınvestıtsııa, farmatsevtıka jáne logıstıka salasyndaǵy Qazaqstan-Úndistan yntymaqtastyǵyn odan ári keńeıtýdiń mańyzdylyǵyna nazar aýdardy», - delingen vedomstvo aqparatynda.

Kezdesý qorytyndysy boıynsha taraptar buryn qol jetkizilgen ýaǵdalastyqtardy iske asyrý maqsatynda ózara tyǵyz is-qımyldy jalǵastyrýǵa, sondaı-aq Nur-Sultan men Nıý-Delı arasyndaǵy strategııalyq áriptestikti odan ári tereńdetýge baǵyttalǵan birqatar is-sharalardy birlesip júrgizýge kelisti.

Úndistan men Qyrǵyzstan Qazaqstannyń Azııadaǵy ózara is-qımyl jáne senim sharalary jónindegi Keńeske aldaǵy tóraǵalyǵyn quptady.