Muhtar Tileýberdi koronavırýsqa qarsy vaktsına saldyrady

NUR-SULTAN. QazAqparat – QR Premer-Mınıstriniń orynbasary – Syrtqy ister mınıstri Muhtar Tileýberdi taıaý kúnderi koronavırýsqa qarsy vaktsına saldyratynyn aıtty, dep habarlaıdy QazAqparat tilshisi.

«Otandyq vaktsınany saldyrýdy josparlaǵan edim, onyń tezirek shyǵýyn kútip otyrmyn. Sonymen birge, halyqaralyq is-sharalar kestesi jıilep barady, áriptestermen kelissózder men pikir almasýlar bolady. Memleket basshysy atap ótkendeı, múmkindiginshe vaktsına jasaý kerek bolady. Sondyqtan taıaý kúnderi vaktsına saldyrmaqpyn», - dedi M. Tileýberdi elordada Majarstan Syrtqy ekonomıkalyq baılanystar jáne syrtqy ister mınıstri Peter Sııartomen kelissózderden keıin.

Óz kezeginde Majarstan mınıstri vaktsınanyń birinshi komponentin alǵanyn, taıaý arada ekinshi komponentin alýǵa baratynyn aıtty.

«Majarstanda qarasha aıynda strategııalyq sheshim jasalyp, shyǵystan vaktsına satyp alýǵa qatysty qadamdar boldy. Vaktsınalaý arqyly adam ómirin saqtaýǵa múmkindik bolady dep sanaımyz. Bizde vaktsınany Reseı men Qytaıdan satyp alý sheshimi qabyldandy. Qazirgi kezde vaktsınalaý boıynsha Majarstan jaqsy kórsetkishke ıe boldy, jaqyn arada 2,5 mln adamǵa jetkizemiz», - dedi P. Sııarto.

Budan buryn habarlanǵandaı, búgingi kelessiózderden keıin taraptar eki el arasyndaǵy birneshe qujatqa qol qoıdy.

Aıta keteıik, Ortalyq Azııa óńirinde majar kompanııalarynyń múmkindikteri keńeıtilmek.