Muhtar Tileýberdi QHR ShUAÓ basshylyǵymen ekijaqty yntymaqtastyqty talqylady

BEIJІŃ-ÚRІMJІ. QazAqparat - 17-19 sáýirde QR Syrtqy ister mınıstriniń birinshi orynbasary Muhtar Tileýberdi QHR Shyńjań-Uıǵyr avtonomııalyq ólkesine issaparmen bardy, dep habarlaıdy QazAqparattyń Qytaıdaǵy menshikti tilshisi.

Dıplomat sapar barysynda Qytaı kommýnıstik partııasynyń Ortalyq komıteti Saıası bıýrosynyń múshesi, ShUAA partııa komıtetiniń hatshysy Chen Tsıýango, ShUAA halyqtyq úkimetiniń basshysy Shohrat Zakır, Shyńjań partııalyq komıtetiniń saıası-quqyqtyq komıssııasynyń hatshysy Chjý Haılýn jáne aımaqtyń halyqtyq úkimeti partııalyq tobynyń múshesi Hýan Sanpınmen kelissózder júrgizdi.

Qazaqstandyq dıplomat Qytaı tarapyna «Bir beldeý, bir jol» jobasyn júzege asyrýdaǵy Qazaqstannyń róline toqtalyp, Qazaqstannyń oblystary men ShUAÓ arasyndaǵy aımaqaralyq damýdyń qajettiligin aıryqsha atap ótti.

Qos tarap terrorızm, ekstremızm jáne separatızmge qarsy kúresý, quqyq qorǵaý organdarynyń yntymaqtastyǵyn nyǵaıtý, transshekaralyq ózender salasyndaǵy qarym-qatynas, ekonomıkalyq baılanystar, sonymen qatar transporttyq sala, konsýldyq qyzmet taqyryptaryn talqylady.

Qos el arasyndaǵy «altyn kópir» jaǵdaıy, Qytaıdaǵy qazaq dıasporasy, qos azamattyqty retteý máseleleri boıynsha pikir almasý boldy.

Qytaı tarapy Qazaqstanmen ári qaraı yntymaqtastyqty damytýǵa daıyn ekendikterin bildirdi, aıta keterligi Qazaqstan ShUAÓ Ortalyq Azııadaǵy saıası, saýda-ekonomıkalyq, mádenı-gýmanıtarlyq saladaǵy iri áriptesi bolyp tabylady.

Qazaqstandyq delegatsııa sapar barysynda qytaılyq isker toptardyń ókilimen kezdesip, ındýstrıaldyq jáne ınvestıtsııalyq yntymaqtastyq jaıyn talqylady.