Muhtar Tileýberdi qazaqstandyq dıplomattardy kásibı merekesimen quttyqtady
«Qurmetti qazaqstandyq dıplomattar! Qurmetti ardagerler! Osydan 28 jyl buryn 2 shildede Memleket basshysy Táýelsiz Qazaqstannyń syrtqy saıası vedomstvosyn qurý týraly Jarlyqqa qol qoıǵany ózderińizge málim. Sol kezdegi kúrdeli jaǵdaıǵa qaramastan, Mınıstrliktiń alǵashqy qyzmetkerleriniń janqııarlyǵy men kásipqoılyǵy arqasynda dıplomatııalyq qyzmettiń basty negizderi, irgetasy men jumys qaǵıdattary is júzinde «taza paraqtan» qalyptastyryldy. Jańa qurylǵan otandyq dıplomatııalyq qyzmettiń kadrlyq, qarjylyq máselelerin sheshýde, bizdiń shet elderdegi alǵashqy ókildikterdi ashý baǵytynda qomaqty jumys atqaryldy. Aǵa býyn ókilderiniń is-áreketteri nátıjesinde «Syrtqy ister mınıstrliginiń rýhy» qalyptasty. Osy oraıly sátti paıdalanyp ardagerlerimizge alǵys, salamyzdyń qalyptasýyna uıytqy bolǵan tulǵalarǵa shynaıy qurmetimdi bildirgim keledi. Memleketimizdiń halyqaralyq arenadaǵy búgingi tabystary men jeńisteri birinshi kezekte Sizderdiń eńbekterińiz» dep atap ótti Syrtqy ister mınıstri óz quttyqtaýynda.
Onyń aıtýynsha, Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń jáne Prezıdentimiz Qasym-Jomart Toqaevtyń jetekshiligimen elimizdiń syrtqy saıasaty pragmatızm jáne konstrýktıvızm qaǵıdattary, tıimdi yntymaqtastyq pen qarym-qatynastar negizinde damyp kele jatyr.
«Búginde biz álemniń 182 memleketimen dıplomatııalyq qarym-qatynas ornattyq, elimizdiń mańyzdy halyqaralyq uıymdarǵa kirýin qamtamasyz ettik. Qazaqstannyń álemniń 103 eldi qamtıtyn, 98 shet elderdegi mekemesi bar. Biz kópjaqty jáne ekijaqty yntymaqtastyqtyń 3700 astam halyqaralyq qujattan turatyn qomaqty sharttyq-quqyqtyq bazasyn jasadyq, ol ulttyq múddeler men ózekti halyqaralyq máselelerdiń barlyǵyn qamtıdy. Qazaqstannyń memlekettik shekarasyn delımıtatsııalaý týraly halyqaralyq sharttarǵa qol qoıylýy jáne olardyń kúshine enýi qazaqstandyq dıplomatııanyń mańyzdy jetistikteriniń biri bolyp tabylady. Búgin bizdiń syrtqy shekaramyz – tatý kórshilik pen yntymaqtastyq shegi retinde qarastyrylady. Táýelsizdiginiń alǵashqy jyldarynda «qaýipsizdikti tutynýshy» jáne álemdik saıasatqa jańadan aralasa bastaǵan Qazaqstan búginde «turaqtylyq generatoryna» jáne keıbir janjaldardy retteýge belsendi túrde atsalysqan medıatorǵa aınaldy» deıdi Muhtar Tileýberdi.
Mınıstrdiń sózine sensek, halyqaralyq arenadaǵy aıtarlyqtaı jetistikterimizge qaramastan, biz qol jetkizgen tabystarymyzben toqtalyp qala almaımyz, alda bizdi aýqymdy jańa jumystar kútip tur. Álemde eski qubylystar transformatsııalanýda, kóptegen oń nemese teris sıpattaǵy kúrdeli jańa protsester óris alýda.
Muhtar Tileýberdi atap kórsetkendeı, bizdiń mindetimiz - syn-tegeýrinderge laıyqty jáne nátıjeli den qoıyp, jańadan ashylǵan múmkindikterdi tolyǵymen ári tıimdi paıdalaný.
«Bul maqsatta bizdiń dıplomattardyń qazirgi býynynan jumysta kreatıvti ádisterdi qoldanýyn, tolyqtaı kúsh-jigerin jumsaýyn ári óziniń kásibı deńgeıin únemi jaqsartýyn kútemiz. Bul syrtqy saıası vedomstvonyń jańa sapaly deńgeıge ótýine yqpal etedi. Sonymen qatar, osy jyl álemdi dúrliktirgen jáne tynysyn taryltqan, halyqaralyq qarym-qatynastarǵa kedergi keltirgen qaterli dert - koronavırýs indetimen kúresý jyly bolyp otyr. Álemde pandemııa jarııalanǵannan keıin Mınıstrligimiz ben dıplomatııalyq ókildikterimiz Qazaqstan azamattarynyń elge oralýyna bar kúsh-jigerin salyp, shet memleketterdiń medıtsınalyq kómegi men jabdyqtaryn alýǵa atsalysty. Bul oraıda, elimizdegi tótenshe jaǵdaı men karantın kezeńi úshin arnaıy qurylǵan SІM Shtabynyń, konsýldardyń jáne belsendilik kórsetken basqa da áriptesterimizdiń jumysyn erekshe atap ótkim keledi. Bizdiń aldymyzda asar belester men baǵyndyrar shyńdar áli de barshylyq. Olarǵa qol jetkizý úshin bárimizdi jumylǵan judyryqtaı birtutas mehanızm bolyp jumysty jalǵastyrýǵa shaqyramyn! Syrtqy saıasat salasyndaǵy qajyrly eńbekterińiz úshin shynaıy alǵysymdy bildire otyryp, Sizderdiń barshańyzdy búgingi merekemen shyn júrekten quttyqtaımyn. Egemendi elimizdiń ıgiligi úshin atqaryp jatqan qyzmetterińiz jemisti bolsyn. Elimizge tynyshtyq, jerimizge bereke, otbasylaryńyzǵa baqyt jáne zor densaýlyq tileımin « dep túıindedi sózin Muhtar Tileýberdi.
