Muhtar Tileýberdi qazaqstandyq delegatsııanyń Kabýl saparyna qatysty túsinikteme berdi

NUR-SULTAN. QazAqparat – QR Premer-Mınıstriniń orynbasary – Syrtqy ister mınıstri Muhtar Tileýberdi qazaqstandyq delegatsııanyń taıaýdaǵy Aýǵanstanǵa saparyna qatysty túsinikteme berdi, dep habarlaıdy QazAqparat tilshisi.

«Delegatsııa Aýǵanstanǵa gýmanıtarlyq kómek kórsetý jónindegi arnaýly mıssııamen bardy. Halyqaralyq qoǵamdastyqta Aýǵanstandy ekonomıkalyq kollapska, gýmanıtarlyq daǵdarysqa túsirýge bolmaıdy delingen ortaq túsinik bar. Óıtkeni, munyń naqty táýekelderi men syn-qaterleri bar. Eń aldymen bul esirtki tasymalynyń, din ekstremızmniń artýyna, sonymen qatar bosqyndardyń kóbeıýine alyp keledi. Birinshiden – gýmanıtarlyq kómek kórsetý, ekinshiden – jańa ekonomıkalyq baılanystar ornatý. Aýǵanstan ekonomıkasynyń kúıreýine jol bermeý úshin múmkindik usyný qajet», - dedi Muhtar Tileýberdi Úkimet otyrysynan keıin BAQ ókilderine bergen suhbatynda.

Mınıstr «Talıban» qozǵalysyn (Qazaqstanda tyıym salynǵan) halyqaralyq qoǵamdastyq moıyndaǵamandyǵyn atap ótti. Al ony halyqaralyq qoǵamdastyq moıyndaýy úshin BUU qaýipsizdik keńesiniń qarary qajet.

«Barlyǵy da ekonomıkalyq daǵdarystyń oryn alýy múmkin ekendigin túsinedi. Sebebi aýǵan Úkimetiniń halyqaralyq esepshoty buǵattalǵan. Eger ekonomıkalyq kollaps bolsa, onda bul tereń gýmanıtarlyq baǵdarysqa alyp keledi. Al onyń belgili bir táýekelderi, syn-qaterleri bar. Eń aldymen dinı ekstremızmdiń bas kóterýimen, esirtki tasymalynyń jáne bosqyndar leginiń artýymen baılanysty. Oǵan jol bermeý úshin búkil halyqaralyq qoǵamdastyq aýǵan halqyna gýmanıtarlyq kómek kórsetýge úndep jatyr», - dedi ol.

Osy rette ol Qazaqstan aýǵan halqyna gýmanıtarlyq kómek retinde 5 myń tonna un jiberý sheshimin qabyldaǵandyǵyn eske salyp ótti.

«Bul elmen saýda-ekonomıkalyq baılanystardy da qalypyna keltirý qajet ekendigi sózsiz. Qazirgi ýaqytta bul elmen saıası kelissózder ótkizý týraly sóz qozǵalyp otyrǵan joq. Sóz aýǵan halqyna kómek kórsetý jaıynda ǵana bolyp tur», - dedi Muhtar Tileýberdi.