Muhtar Tileýberdi AQSh-tyń Qazaqstandaǵy elshisimen onlaın-kezdesý ótkizdi

NUR-SULTAN. QazAqparat - Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi AQSh-tyń Qazaqstandaǵy Elshisi Ýılıam Mozermen onlaın-kezdesý ótkizdi, dep habarlaıdy QazAqparat.

Mınıstr amerıkandyq tarapqa qazaqstandyq azamattardy «Jýsan» gýmanıtarlyq operatsııasy aıasynda Sırııadan qaıtarýǵa jáne olardy odan ári beıimdeý barysynda qoldaý tanytqandary úshin alǵys bildirdi.

Taraptar Qazaqstan men AQSh arasyndaǵy keńeıtilgen strategııalyq áriptestik máseleleriniń keń aýqymyn talqylap, eki memleket arasyndaǵy dıplomatııalyq qatynastardyń ornaǵanyna 30 jyl tolýyn atap ótý boıynsha birlesken is-sharalar týraly ýaǵdalasty.