Muhtar Taıjan: Prezıdenttiń jerge qatysty málimdemesi taǵdyrsheshti sóz dep sanaımyn
«Jalpy alǵanda maǵan Prezıdenttiń búgingi sózi unady. Nıeti, baǵdary durys. Bizdi tyńdap, oqyp otyrǵany baıqalady. Árıne, áıtse de tikeleı efırden kórsek jaqsy bolar edi. Medıtsınalyq-áleýmettik saqtandyrý qory, «SQ-Farmatsııa», jergilikti ózin-ózi basqarý, jańa kadrlar, memlekettik basqarý júıesi, úkimettiń otstavkasy týraly aıtqandarynyń barlyǵy durys. Biraq men úshin, jalǵyz men ǵana emes, barlyǵymyz úshin jerge qatysty myna málimdemesi taǵdyrsheshti sóz dep sanaımyn: «Jer sheteldikterge satylmaıdy - bul máselege endi oralmaımyz. 2021 jyly moratorıı aıaqtalǵansha bul máseleni túpkilikti sheshý kerek», dep Muhtar Taıjan Facebook paraqshasynda Prezıdenttiń sózin keltirdi.
Muhtar Taıjan óz tarapynan úlken mólsherdegi jer telimderi, ıaǵnı aýylsharýashylyǵy jerleri jeke menshikke eshkimge satylmaýy kerektigin jazǵan.
«Qazaqstan azamattaryna da, sheteldik úlesi bar fırmalarǵa da, tek arendaǵa berilýi tıis. Bunyń barlyǵy jańa zańda rettelýi tıis jaǵdaıattar. Jer máselesimen 2016 jyldan beri aınalysyp júrgen azamat retinde atap ótkim keledi, máseleni kezeń-kezeńmen sheshý taktıkasy ózin aqtady: aldymen 5 jyldyq moratorıı jarııaladyq (ýaqyttan uttyq), endi naqty sheshim qabyldaımyz. Jer máselesi – iri latıfýndısterdiń kóptegen mıllıardtyq múddeleri bar óte kúrdeli másele. Barlyǵyn birden 2016 jyly sheship tastaý múmkin emes edi – saıası ahýal oǵan jol bermedi. Ómirde de ózi mundaı jaǵdaılar bolady, bári birden ornaı salmaıdy. Biraq, eń bastysy – aqyrǵy nátıje. Munyń barlyǵy halyqtyń óziniń patrıotızmi, barlyǵymyzdyń qanǵa sińgen óz jerine degen mahabbatynyń arqasynda múmkin boldy», - deıdi Muhtar Taıjan.
Eske sala ketsek Úkimettiń keńeıtilgen búgingi otyrysynda Qazaqstan Prezıdenti Qasym-Jomart Toqaev jer máselesine qatysty sóılegen edi. Onyń aıtýynsha osy ýaqytqa deıin 12,8 mln gektar ıgerilmegen jerdiń 7 mln gektary memleketke qaıtarylǵan.
