Muhtar Taıjan: Beıbit jınalystar týraly zań jobasy - eldegi demokratııanyń kórsetkishi

ALMATY. QazAqparat – Beıbit jınalystar týraly qabyldanǵan zań óziniń tıimdiligin kórsetti. Qoǵam qaıratkeri Muhtar Taıjan osylaı pikir bildirdi, dep habarlaıdy QazAqparat tilshisi.

Onyń aıtýynsha, mıtıngiler eldegi demokratııanyń kórsetkishi.

«Elge mıtıngiler qajet. Kórip otyrǵanymyzdaı, mıtıngiler shet elderde kún saıyn ótedi, biz de oǵan úırenýimiz kerek. Ár ǵylymı teorııanyń tetigi - ol praktıka. Áriptesterim keltirgen statıstıka men mysaldarǵa súıensek, qazir oǵan degen kózqaras ózgergen. Beıbit jınalystardy ótkizýge arnalǵan jańa zań óziniń tıimdiligin kórsetti. Biz úshin bul zań progressıvti boldy», - dedi sarapshy.

Eske salaıyq, búgin Almatyda tanymal sarapshylar beıbit jınalystar týraly zańnyń nátıjesin talqylady. Sharaǵa belgili qazaqstandyq sarapshylar, quqyq qorǵaýshylar, Ulttyq qoǵamdyq senim keńesiniń músheleri men Qazaqstan Respýblıkasy Prezıdentiniń kómekshisi, Ulttyq keńestiń hatshysy Erlan Qarın qatysty.

Baıandamada jańa zańnyń qoldanylýy azamattarǵa ózderiniń azamattyq pozıtsııasyn kórsetýge keń múmkindikter beretindigine nazar aýdarylady. Sonymen qatar, zań normalary boıynsha jańa oryndarda, qalalardyń ortalyqtarynda beıbit jınalystar ótkizý turǵyn halyqtyń kóp jınalýyna, buqaralyq aqparat quraldarynda jan-jaqty jarııa etýge jol ashty.