Muhtar Shahanovqa «Túrki álemine dara qyzmeti úshin» halyqaralyq syılyǵy berilmek
ALMATY. 3 qańtar. QazAqparat - Qazaqstannyń halyq jazýshysy, Qyrǵyzstannyń halyq aqyny, «Túrki tildes halyqtar arasyndaǵy eń úzdik álem aqyny» ataǵynyń ıegeri, qoǵam qaıratkeri Muhtar Shahanovqa endi «Túrki álemine dara qyzmeti úshin» halyqaralyq syılyǵy berilmek.
Túrki álemi jazýshylary men óner qaıratkerleri qory (TÜRKSAV) prezıdenti ıAhıa Akengınniń habarlaýynsha, ol mamyr aıynda AQSh-tyń Nıý-Iork qalasynda ótetin «Túrki kúni» atty mádenı-ǵylymı konferentsııada tabys etiletin bolady. Buǵan deıin Muhtar Shahanovqa 2006 jyly Ázirbaıjandaǵy «Vektor» halyqaralyq akademııasynda Túrkııa, Ázirbaıjan, Soltústik Kıpr memleketteri atynan «Túrki álemine sińirgen eren eńbegi úshin» dep atalatyn altyn medal men atalǵan akademııanyń qurmetti doktory ataǵy berilgen bolatyn.
1942 jyly 2 shildede Ońtústik Qazaqstan oblysy Lengir aýdany Qasqasý aýylynda ómirge kelgen Alash jurtynyń zańǵar aqynynyń 70 jyldyq mereıtoıyna oraı ótken jyly 300-ge jýyq mektepte is-sharalar ótken bolatyn. Ol búgingi tańda shyǵarmalary eń kóp oqylatyn jáne shet tilderge de kóp aýdarylǵan aqyn bolyp sanalady. 1959 jyly «Syrdarııa» dep atalatyn tuńǵysh óleńin jarııalaǵan M.Shahanov 1972 jyly Qazaqstan Lenın komsomoly syılyǵynyń laýreaty atanyp, KSRO halyq depýtaty, KSRO Joǵarǵy Keńesiniń múshesi, Qazaqstanyń halyq depýtaty jáne QR Parlamenti Májilisiniń depýtaty boldy. 1993-2003 jyldary Qazaqstannyń Qyrǵyz Respýblıkasyndaǵy Tótenshe jáne Ókiletti Elshisi qyzmetin atqarǵan, búgingi tańda «Jalyn» jýrnalynyń bas redaktory bolyp jumys jasaıdy. Sondaı-aq M.Shahanov álem oıshyldarynyń basyn biriktiretin «XXI ǵasyr jáne Rýhanııat» atty halyqaralyq elıta klýbynyń prezıdenti.
