Muhtar Shahanov jansaqtaý bóliminde jatyr
ALMATY. KAZINFORM – Qazaqstannyń halyq jazýshysy, aqyn Muhtar Shahanov densaýlyǵyna baılanysty emhanada jatyr.
Bul týraly áleýmettik jelide Muhtar Shahanov qorynyń tóraǵasy Nurjigit Ysqaq jazdy.
– Halqymyzdyń Qaharman aqyny, ári jazýshysy, ult úshin janyn aıamaı ter tókken azamaty Muhtar Shahanovty bilmeıtin qazaq kem de, kem! Qazir kókemiz 84 jasqa keldi. Biraq densaýlyǵy syr berip, jansaqtaý bóliminde jatyr. Endeshe, kókemizdiń tez saýyǵyp, ortamyzǵa oralýy úshin duǵa jasap qoıaıyq, - dep jazdy ol.
Eske salaıyq, Muhtar Shahanov 1942 jyldyń 2 shildesinde qazirgi Túrkistan oblysy Tóle bı aýdany Qasqasý aýylynda dúnıege kelgen. Ol kópshilikke tili jatyq, qısyny tastaı, oıy shymyr óleńderimen ǵana emes, sheshýshi sátterde batyl áreket etetin táýekelshil minezimen de tanymal. Táýelsizdik jyldary qazaq tiliniń janashyry, dil maıdanynyń sardary retinde repýtatsııa qalyptastyrǵan aqyn Parlament Májilisiniń depýtaty, Qazaqstannyń Qyrǵyz Repsýblıkasyndaǵy Elshisi sııaqty jaýapty qyzmetterdi atqardy. Qazaq ádebıetindegi Muhtar esimin arqalaǵan úsh alyptyń biri sanalatyn aqyn uzaq jyldar boıy «Jalyn» jýrnalyn basqardy.
