Muhtar Nııazov respýblıkalyq aıtystan kólik utty

Shaqshaq Jánibektiń 325 jyldyǵyna, Aqsulý Orysbaıqyzynyń 145 jyldyǵyna, Qaınekeı Jarmaǵambetovtiń 100 jyldyǵyna arnalǵan sóz báıgesi Qostanaıdaǵy Elýbaı Ómirzaqov atyndaǵy oblystyq fılarmonııada uıymdastyryldy. Eki kúnge sozylǵan aıtysqa Aıbek Qalıev, Muhtar Nııazov, Qaziret Berdihan, Meıirbek Sultanhan, Saltanat Ótelbaeva, Ásem Erejeqyzy, Shuǵaıyp Sezimhan, Toba Ótepbaev, Batyrlan Saǵyntaev, Azamat Máljanbaı, Medet Baızaqov, Marat Ahmetov, Marǵulan Ospanov sııaqty elge tanymal aqyndar qatysty. Júrgizýshi - Qazaqstannyń Eńbek sińirgen qaıratkeri, aqyn Júrsin Erman.

Ádil qazylar quramynda halyq aqyndary Ásııa Berkenova men Áselhan Qalybekova, belgili aqyn, dramatýrg Aqylbek Shaıahmet, oblystyq «Qostanaı tańy» gazetiniń tilshisi Nurqanat Qulabaev jáne aqyn Baýyrjan Halıolla boldy.

  Qazylar alǵashqy aınalymnan ozyq shyqqan alty aqyndy juptady. Respýblıkalyq aıtystyń bas júldesin «Altyn dombyranyń» eki márte ıegeri Muxtar Nııazov jeńip aldy. Oblys ákiminiń orynbasary Marat Júndibaev jeńimpazǵa Qostanaıda qurastyrylǵan «Pejo» avtokóligin syıǵa tartty.

1-oryndy Shuǵaıyp Sezimxan aldy. Oǵan 800000 teńge syıaqy berildi. Ekinshi oryndy Qaziret Berdixan men Aıbek Qalıev qanjyǵalady. Al 3-oryn Marat Axmetov pen Meıirbek Sultanxanǵa buıyrdy.

«Qostanaıda 2 kún boıy jyr jármeńkesi ótti. Negizi Qazaqstannyń búkil óńirinde bolyp júrmiz ǵoı. Sonyń ishinde Qostanaı týraly «orystanyp» ketken aımaq degendi kóp estımiz. Biraq, búgin osy sózdi túbegeıli joqqa shyǵaryp jibergim keledi. Máselen, osy aıtysta astarlap aıtqan sóz máıegin uǵynyp otyrǵan turǵyndarǵa rıza boldym. Talǵampaz kórermender osynda turady. Buǵan qosa, qostanaılyq qazylar óz aqyndaryna burmalaǵan joq. Aıtys - oıdyń kúresi. Munda naqty jeńetin adamdy aldyn ala bile almaısyń», - dedi Muhtar Nııazov agenttik tilshisine bergen suhbatynda.

Aıtys qorytyndysynda aqyndarǵa ataýly syılyqtar tapsyryldy. Jaqynda Qyzylordada ótetin respýblıkalyq aıtysqa Qostanaıdan Toba Ótepbaev baratyn boldy