Muhtar Maǵaýınniń uly dúnıeden ótti

ALMATY. KAZINFORM – Belgili jazýshy, marqum Muhtar Maǵaýınniń uly  Maǵjan Maǵaýın dúnıeden ozdy.

Qaraly habardy týysqandary rastady.

– Keshe júrek talmasy ustap, №7 aýrýhanada qaıtys boldy. Janaza erteń, 25 maýsym kúni tańǵy saǵat 10:00-de ótedi. Raıymbek aýylyndaǵy óz úıinen shyǵady, – dep habarlady marqumnyń týysy.

Eske salaıyq, osy jyldyń basynda Halyq jazýshysy Muhtar Maǵaýın 84 jasynda dúnıeden ótken bolatyn. 

Muhtar Muqanuly Maǵaýın 1940 jyly 2 aqpanda sol kezdegi Semeı oblysynyń Shubartaý aýdanynda týǵan. 1962 jyly Qazaq memlekettik ýnıversıtetiniń fılologııa fakýltetin, 1965 jyly aspırantýrasyn bitirgen.

«Qazaq ádebıeti» gazetiniń bólim meńgerýshisi, «Jazýshy» baspasynda bas redaktordyń orynbasary, Qazaq KSR Ǵylym akademııasynyń M.Áýezov atyndaǵy Ádebıet jáne óner ınstıtýtynda aǵa ǵylymı qyzmetker bolyp qyzmet atqardy.

1984-86 jyldary «Jazýshy» baspasynyń bas redaktory, 1988-2006 jyldary «Juldyz» jýrnalynyń bas redaktory boldy.

Baspasóz betinde alǵash ret 1959 jyly kórindi. 60-jyldary negizinen ádebıet zertteýshisi retinde tanyldy. Shyǵarmalary orys tiline aýdarylǵan, shetel tilderinde basylǵan. Fılologııa ǵylymynyń kandıdaty (1967) degen ǵylymı ataǵy bar. Qazaqstan Jazýshylar odaǵy Basqarmasynyń hatshysy bolyp ta qyzmet atqarǵan.

«Alasapyran» tarıhı roman-dılogııasy úshin Qazaq KSR-iniń Abaı atyndaǵy memlekettik syılyǵy berildi. Qazaqstannyń Halyq jazýshysy (1984) ataǵynyń, Túrkııanyń halyqaralyq «Túrik dúnıesine qyzmet» syılyǵynyń ıegeri (1997), «Tarlan» syılyǵynyń laýreaty (2002), Qazaqstannyń Qurmetti jazýshysy (2019) boldy.

2006 jyldyń jeltoqsanynda Qazaqstannan Cheh Respýblıkasyna qonystandy. Sodan beri Chehııa, AQSh, Túrkııa elderinde turyp, shyǵarmashylyqpen, ǵylymı zertteýlermen aınalysty.

Buǵan belgili ádebıettanýshy, folklortanýshy ǵalym, Ulttyq Ǵylym akademııasynyń akademıgi, fılologııa ǵylymdarynyń doktory, QR Memlekettik syılyqtyń laýreaty Seıit Qasqabasov ómirden ótkenin jazǵan bolatynbyz.