Muhtar Qul-Muhammed Jambyl oblysynda «jasyl» energetıkanyń damýyna joǵary baǵa berdi
ASTANA. QazAqparat - Búgin «Nur Otan» partııasy Tóraǵasynyń birinshi orynbasary Jambyl oblysyna bardy. Sapar barysynda Muhtar Qul-Muhammed elimizdegi eń iri jel elektr stansasynyń jumysymen tanysty. Sondaı-aq, jergilikti fermerlermen kezdesip, irimshik zaýytynda boldy jáne Taraz qalasynda «Nurly jol» baǵdarlamasy boıynsha salynyp jatqan kóp páterli turǵyn úıdiń qurylys jumystaryna baqylaý júrgizdi, dep habarlaıdy atalǵan partııanyń baspasóz qyzmeti.
Qazaqstandaǵy eń iri jel elektr stansalarynyń biri Jambyl oblysynda ornalasqan. Munda jylyna 50 mln. kVt/saǵ-qa deıin elektr qýatyn óndiredi. Bul oblystaǵy 150 myńǵa jýyq halqy bar Qordaı aýdanyn tolyq elektr kózimen qamtamasyz etýge jetetin qýat. Quny 12 mlrd. teńgeden asatyn joba memlekettiń qoldaýymen júzege asyryldy. Atap aıtqanda, bul joba Indýstrııalandyrý kartasy jáne «Bıznestiń jol kartasy-2020» memlekettik baǵdarlamasy boıynsha qarjylandyryldy.
Partııa Tóraǵasynyń Birinshi orynbasary Jambyl oblysynyń ákimi Kárim Kókirekbaevpen birge Germanııada jasalǵan energetıkalyq qondyrǵylardyń jumysymen tanysty. Mundaı jel týrbınalarynyń bıiktigi - 60 metr, al salmaǵy 180 tonnaǵa deıin jetedi. Muhtar Qul-Muhammed atap ótkendeı, balamaly energetıkany qoldanýdyń arqasynda Jambyl oblysynda «jasyl ekonomıkany» damytý boıynsha aımaqta aldyńǵy orynnan kórinýge múmkindik mol.
Sonymen qatar, Jambyl oblysy aýyl sharýashylyǵynda da aıtarlyqtaı jetistikterge qol jetkizip otyr. Soǵan saı búginde bul sala óńirdegi basym baǵyttardyń biri bolyp sanalady. Ótken jyly ǵana oblys jalpy quny 200 mlrd. teńgeden astam qarjyny quraıtyn aýylsharýashylyq ónimderin óndirdi.
Sapar barysynda «Nur Otan» partııasy Tóraǵasynyń Birinshi orynbasary «Merki irimshik zaýyty» JShS-ǵa arnaıy bardy. Atalǵan kásiporyn 70-ten astam sút ónimderin óndiretin óńirdegi jalǵyz iri sharýashylyq. Zaýyttyń taǵy bir ereksheligi retinde onyń 40 sharýa qojalyǵyn biriktirip otyrǵanyn atap ótken jón. Osyndaı sátti bastamanyń arqasynda óndiris ornynda ónimdilik qýaty, tutynýshylar bazasy, jumysshylar sany jáne jalaqy kólemi artqan.
«Elbasy tapsyrmasymen jyl saıyn aýyl sharýashylyǵyn qoldaýǵa mıllıardtaǵan qarjy bólinýde. Olardy tıimdi paıdalaný úshin usaq sharýashylyqtar iri kooperatıvke birigýi kerek. Merki irimshik zaýyty osyndaı 40 sharýashylyqtyń basyn qosady. Mine, bul Elbasy tapsyrmasy tıimdi júzege asýynyń naqty kórinisi», - dedi Muhtar Qul-Muhammed.
Jambyl oblysynda qurylys jumystary da qarqyndy júrgizilýde. Oǵan sońǵy jyldardyń ishinde alǵash ret qurylys jumystarynyń kólemi 103 mlrd. teńgeden asyp, bul salaǵa salynǵan ınvestıtsııanyń birden 32 paıyzǵa artqany dálel. Atalǵan salanyń munshalyqty serpin alýy «Nurly jer» turǵyn úı qurylysy jańa memlekettik baǵdarlamasynyń bastalýymen tikeleı baılanysty. Sapar aıasynda partııa Tóraǵasynyń Birinshi orynbasary Taraz qalasynda salynyp jatqan «Araı» turǵyn alabyndaǵy kóp páterli úılerdiń qurylys jumystarymen tanysty. Bas josparǵa sáıkes bul keshende 19 kóp páterli úı salý kózdelýde. Páterler «Báıterek Development» aktsıonerlik qoǵamy jáne «Turǵynúıqurylysjınaqbanki» arqyly satylady. Sondaı-aq, kommýnaldy turǵyn úı qorynda páter kezeginde turǵandarǵa da atalǵan keshennen baspana alýǵa múmkindik bar.
«Nur Otan» partııasy Tóraǵasynyń Birinshi orynbasary mundaı memlekettik baǵdarlamalardyń júzege asýy partııa ókilderiniń qatań baqylaýynda bolatynyn aıtty. Sondyqtan nurotandyqtar bólingen qarjynyń tıimdi ári tolyq jumsalýyn, úılerdiń barlyq tehnologııalyq talaptarǵa saı salynýyn jáne páterlerdiń turǵyndarǵa ýaqytyly berilýin udaıy nazarda ustaýy tıis.
Muhtar Qul-Muhammed partııanyń oblystyq aktıvimen kezdesýinde de negizgi memlekettik baǵdarlamalardy júzege asyrýda nurotandyqtardyń róli qandaı bolý kerektigine toqtalyp ótti. Jıynda partııa Tóraǵasynyń Birinshi orynbasary áriptesterine Elbasy usynǵan ekonomıkalyq jáne saıası reformalardyń máni men mańyzyn halyqqa túsindirý jóninde naqty tapsyrmalar berdi.
Budan bólek, partııa qaıratkeri M.H.Dýlatı atyndaǵy Taraz memlekettik ýnıversıtetiniń stýdent jáne oqytýshy-professorlar quramymen kezdesti. Shara barysynda Muhtar Abraruly Prezıdenttiń ulttyq rýhanı jańǵyrý jónindegi baǵdarlamalyq maqalasynda aıtylǵan basym baǵyttarǵa erekshe kóńil bóldi. Elbasynyń «Bolashaqqa baǵdar: rýhanı jańǵyrý» atty bul maqalasy ár jas qazaqstandyqtyń basty qujaty bolýy tıis. Tarıhı qujattyń mańyzy jóninde aıtqan Muhtar Qul-Muhammed Memleket basshysynyń Táýelsiz Qazaqstandy jarqyn bolashaqqa jetkizý jolynda jastarǵa erekshe senim artyp otyrǵanyn jetkizdi.
