Muhtar Qul-Muhammed Úlken Almaty ózeniniń joǵarǵy jaǵyndaǵy bógettiń qurylysymen tanysty

ALMATY. QazAqparat - Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed óńirge sapary aıasynda Úlken Almaty ózeniniń joǵarǵy jaǵyndaǵy Aıýsaı ózeniniń saǵasynan tómen ornalasqan sel ustaıtyn bóget qurylysynyń barysymen tanysty. Bul týraly QazAqparat joǵary palatanyń baspasóz qyzmetine silteme jasap habarlaıdy.

Sel qaýpi bar aımaqta ornalasqan adamdardyń, sharýashylyq júrgizý obektileriniń ómirin qorǵaýdy qamtamasyz etýge, sondaı-aq qaqpaqtan tómengi jerde salynyp jatqan bógettiń qurylysy aǵys boıynan tómen ornalasqan sel qoımasynyń qyzmet etý merzimin uzartýǵa múmkindik beretin bolady.

«Elimiz Prezıdenti Qasym-Jomart Kemeluly Toqaevtyń Almaty qalasynyń sel qaýipsizdigin qamtamasyz etý jónindegi tapsyrmasy ýaqtyly jáne naqty oryndalýy tıis. Ol óńirdegi sý resýrstarynyń tapshylyǵy, klımattyń kúrt ózgerýi, ekonomıkalyq sıpattaǵy is-qımyldyń óse túskeni jaǵdaıynda sizderdiń jumystaryńyzǵa tikeleı baılanysty», - dedi senator.

Kezdesýlerde Memleket basshysynyń «Jańa Qazaqstan: Jańarý men jańǵyrý joly» atty Qazaqstan halqyna Joldaýyndaǵy alǵa qoıylǵan mindetter jan-jaqty talqyǵa salynyp, pikir almasyldy. Depýtat máslıhattardyń rólin qaıta aıqyndaý nemese oblys halqynyń negizgi bóligi turatyn Almaty qalasymen shekaralas oblystyń qurylýyna baılanysty barlyq bastamalar memlekettiń egemendigin, aýmaqtyq tutastyǵyn qorǵaýǵa jáne azamattarymyzdyń túpkilikti múddelerin qamtamasyz etetin strategııalyq baǵytty sheshýge arnalǵanyn atap ótti.