Muhtar Qul-Muhammed Senattyń fýnktsııasyn qaıta qaraýǵa qatysty jarııalanǵan bastamalarǵa pikir bildirdi
Depýtattyń paıymynsha, Prezıdenttiń Senattaǵy kvotasyn 15-ten 10 depýtatqa deıin azaıtý týraly sheshimi durys qadam.
Sonymen qatar senator Joldaý aıasynda zań qabyldaý quqyǵy Májiliske ǵana tıesili bolatyny týraly aıtylǵan bastamaǵa pikir bildirdi.
Depýtat bul ókilettiktiń aýysýy ońtaıly ekenin, bul praktıka kóptegen memlekette bar ekenin atap ótti.
«Osy rette sońǵy sheshimdi, ıaǵnı zańdy qabyldaý nemese qabyldamaý jóninde Senat aıtatyny kórsetildi. Bul álemdik tájirıbede bar qadamdar, oǵan alańdaıtyn sebep joq», - dedi M. Qul-Muhammed tilshilerdiń saýalyna jaýap bere otyryp.
Aıta keteıik, Memleket basshysy Qasym-Jomart Toqaev bıylǵy Joldaýynda Prezıdenttiń Senattaǵy kvotasyn 15-ten 10 depýtatqa deıin azaıtý týraly sheshim qabyldaǵanyn jarııalady. Onyń beseýin Qazaqstan halqy Assambleıasy qazirgideı saılamaıdy, tek usynatyn bolady.
Qazaqstan halqy Assambleıasynyń Májilistegi kvotasy joıylmaq. «Meniń oıymsha, bul – saıası jaǵynan da, zańdyq turǵydan da durys qadam. Bul kvota Senatqa aýysady jáne 9-dan 5 depýtatqa deıin kemıdi», - dedi Prezıdent.
Budan bólek, Memleket basshysy Senatqa Májilis qabyldaǵan zańdardy tek maquldaý nemese maquldamaý quqyǵyn beretin norma engizgen durys dep sanaıtynyn aıtty.
«Soǵan sáıkes, zań qabyldaý quqyǵy Májiliske ǵana tıesili bolady. Al, Senattyń ókilettigin Konstıtýtsııalyq keńes pen Joǵary sot keńesiniń tóraǵasy laýazymyna usynylatyn kandıdattarǵa kelisim berý quqyǵymen tolyqtyrǵan jón. Bul ózgeris saıası júıedegi tepe-teńdik jáne tejemelik mehanızmderin eleýli túrde nyǵaıta túsedi, zań shyǵarý úderisin edáýir jeńildetedi. Sonymen qatar, tómengi palatanyń quzyretin keńeıtý qajet», - dedi Qasym-Jomart Toqaev.
