Muhtar Qul-Muhammed Rýmynııanyń Qazaqstandaǵy Elshisimen kezdesti
NUR-SULTAN. QazAqparat - Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed Rýmynııanyń bizdiń eldegi elshisi Chezar-Manole Armıanýmen Qazaqstannyń osynaý eýropalyq memleketpen yntymaqtastyǵyn nyǵaıtý keleshegin talqylady. Bul týraly QazAqparat joǵary palatanyń baspasóz qyzmetine silteme jasap habarlaıdy.
Aldaǵy jyly bizdiń elderimiz arasynda dıplomatııalyq qatynastardyń ornaǵanyna 30 jyl tolady. Osyǵan oraı áńgime barysynda taraptar ótken jyldarda baılanystardyń jemisti damýy úshin berik irgetas qalaýmen qatar ózara tıimdi kóptegen baǵyttar boıynsha tyǵyz yntymaqtastyqqa qol jetkizgeni atalyp ótildi. Bul qatarda qarqyndy damyp kele jatqan parlamentaralyq dıalog erekshe oryn alady.
«Rýmyn depýtattary elimizdiń qoǵamdyq-saıası ómirine basa nazar aýdaryp otyr. Oǵan eki eldiń Parlamentterinde jumys isteıtin «Qazaqstan-Rýmynııa« dostyq toptary zor eńbek sińirdi. Biz osy toptardyń áleýetin belsendi paıdalanýymyz kerek dep oılaımyn. Biz rýmynııalyq áriptesterimizben ekijaqty yntymaqtastyqty nyǵaıtyp qana qoımaı, sondaı-aq EQYU Parlamenttik Assambleıasy, Eýropa Keńesi jáne Parlamentaralyq Odaq sııaqty halyqaralyq parlamentaralyq uıymdar aıasynda kópjaqty baılanystardy damytýǵa nıettimiz», - dep atap ótti Muhtar Qul-Muhammed.
Júzdesýshiler ekonomıkalyq baılanystardy ulǵaıtýdyń mańyzyn da atap ótti. Joǵary tehnologııalar, energetıka, aýyl sharýashylyǵy salalary men tranzıt-kóliktik jáne ınvestıtsııalyq áleýetti aýqymdy iske asyrý keleshegi zor baǵyttar bolyp belgilendi. Bizdiń elderimiz arasyndaǵy belsendi mádenı-gýmanıtarlyq yntymaqtastyqtyń joǵary deńgeıin odan ári qoldaýdyń da mańyzy zor bolyp otyr.
«2020 jyly Abaıdyń 175 jyldyǵy men ál-Farabıdiń 1150 jyldyǵyn merekeleý aıasynda Rýmynııada mańyzdy sharalar ótti. Býharestte qazaqtyń uly aqynyna bıýst ashyldy. Basqa qalalarda mádenıet kúnderi men qazaqstandyq kıno kúnderi ótkizildi. Babesh-Boıaı ýnıversıtetinde «Qazaqstan» ortalyǵyn, Medjıdııa qalasynda «Qazaqstan» skverin jáne Qurmanǵazy eskertkishin, sondaı-aq Nur-Sultanda aqyn Mıhaı Emıneskýdiń eskertkishin ashý josparda bar», - dep atap ótti senator.
Muhtar Qul-Muhammed Qazaqstan Senaty ekijaqty yntymaqtastyqtaǵy osy jáne basqa da máseleler boıynsha Qazaqstan men Rýmynııa arasyndaǵy ózara is-qımyldy nyǵaıtý jónindegi belsendi jumystardy jalǵastyra beretinin atap ótti.
