Muhtar Qul-Muhammed Reseı depýtatynyń daýly málimdemesine pikir bildirdi

ASTANA. QazAqparat – «Reseı Federatsııasynyń Memlekettik dýmasy, TMD isteri, eýrazııalyq ıntegratsııa jáne otandastarmen baılanys jónindegi komıtet tóraǵasynyń birinshi orynbasary» deıtin laýazymy bar depýtat Konstantın Zatýlın Qazaqstan men Reseı arasyndaǵy áriptestik qarym-qatynas týraly daýly málimdeme jasaǵan bolatyn. QR Parlament Senatynyń halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed sol málimdemege jaýap qatty, dep habarlaıdy QazAqparat tilshisi.

«Depýtat Zatýlınniń tanymaldyq reıtıngi tússe boldy, arandatpa málimdemeler aıta bastaıdy. Buǵan deıin de birneshe ret osylaı bolǵan. Qazaqstandyq bankter reseılik «Mır» bank kartasyna qatysty óte durys áreket jasady. Birinshiden, bizdegi ekinshi deńgeıdegi bankterdiń bári jeke menshikte. Sondyqtan qandaı bank kartasymen jumys isteý paıdaly ekenin, qolaıly boltatynyn ózderi sheshedi. Ekinshiden, «Mır» kartasynyń aınalasynda shý men janjal kóp. «Aqsha tynyshtyqty jaqsy kóredi» deıtin támsil bar. Sondyqtan ol óz «alańdaýshylyǵy» men «narazylyǵyn» óz elindegi bank júıesine aıtsyn. Ondaǵy bank júıesi Zatýlın sııaqtylardyń «arqasynda» óte qıyn jaǵdaıda qalyp otyr. Bizge jol kórsetkenshe sanktsııadan qalaı shyǵatynyn oılasyn. «Qazaqstannyń joly taıǵaq» dep otyrǵandardyń ózderi talaıdan beri taıǵaq jolǵa túsip alǵan», - deıdi senator.

Sondaı-aq, ol atalǵan depýtattyń jazda da daýly málimedeme jasaǵanyn eske saldy.

«Aıtpaqshy, jazda bul depýtat «bizde de Ýkraınadaǵydaı jaǵdaı bolýy múmkin» ekenin aıtyp, shúılikken. Ýkraınanyń jaǵdaıy qandaı bolǵanyn jumyldyrý sharalarynan kórip otyrmyz. Sondyqtan ol tili men oıyna ıe bolyp, tynysh otyra almaıtyn basyn tártipke keltirip alsyn», - dep atap ótti senator Muhtar Qul-Muhammed.

Eske salsaq,buǵan deıin májilismen Aıgúl Quspan reseılik depýtattyń málimdemesine jaýap bergen edi.