Muhtar Qul-Muhammed Eýroparlament qarary jaıynda: Áriptester durys qorytyndy shyǵarady dep úmittenemiz
Senat komıtetiniń tóraǵasy keıingi 2 jyl ishinde Qazaqstannyń Qasym-Jomart Kemeluly Toqaevtyń bastamasymen demokratııalyq, saıası reformalardyń 4 birdeı toptamasyn qabyldaǵanyn eske saldy.
Nátıjesinde, qazaq qoǵamynda uzaq jyldar boıy qordalanǵan kóptegen problemalar oń sheshimin tapty.
«Otandyq zań júıesine beıbit sherýlerdi burynǵysynsha arnaıy ruqsatpen emes, tek aldyn ala maǵlumdaý arqyly ótkizý, saıası partııalardy tirkeýge qajetti shekteýdi 40 myń adamnan 20 myńǵa deıin tómendetý, áıelder men jastarǵa arnalǵan mindetti 30 paıyzdyq kvota engizý, parlamenttik oppozıtsııa ınstıtýtyn qalyptastyrý sııaqty normatıvti quqyqtyq ózgerister engizildi. Budan basqa aýyl ákimderin tikeleı saılaý qolǵa alynyp, ol ótken jyly oıdaǵydaı júzege asty», - deıdi Muhtar Qul-Muhammed.
Sonymen qatar senator Májilis depýtattaryn saılaý úshin uzaq jyldar kedergi bolyp kelgen 7 paıyzdyq talap 5 paıyzǵa deıin tómendetilip, saılaý bıýlletenderine «bárine qarsymyn» degen baǵan qosylǵanyn eske saldy.
Ótken jyldyń sońynda bir top Parlament depýtattarynyń avtorlyǵymen «Adam quqyǵy jónindegi ýákil týraly» zań qabyldanyp, qoldanysqa engizildi.
«Osynyń bári nebári 2 jyl ishinde júzege asyryldy. Bul atalǵan qysqa merzim úshin az jetistik emes. Dál qazirgi kezde otandyq zańnamanyń demokratııalyq talapqa saılylyǵy jóninen Qazaqstan Táýelsiz Memleketter Dostastyǵy elderiniń aldynda tur desek, artyq aıtqandyq bolmaıdy. Demokratııa – óz quqyǵyńdy aıqaılap talap etý ǵana emes – ózgeniń de quqyǵyn syılaý. «Qańtar oqıǵasy» kezinde osy talap óreskel buzyldy. Beıbit sherýge shyqqan halyqty qalqan etken ishki jáne syrtqy destrýktıvti kúshter quqyq qorǵaý qyzmetkerlerine oq atyp, saldarynan halyqtyń zańdy quqyqtaryn qorǵaý kúzetinde turǵan qanshama azamat qaza tapty», - dedi depýtat.
«Mine, osyndaı búkil Qazaqstan halqynyń qaýipsizdigi men bostandyǵyna, el táýelsizdigine qaýip tóngen jaǵdaıda Konstıtýtsııa kepili sanalatyn Prezıdent birden bir durys sheshim qabyldap, elge ujymdyq qaýipsizdik kúshterin ýaqytsha engizdi. Nátıjesinde zor qaýiptiń aldy alynyp, arada nebári bir apta ýaqyt ótkende bul kúshter túgelimen keri qaıtaryldy», - dedi ol.
Muhtar Qul-Muhammed qazir Qazaqstannyń quqyq qorǵaý organdary «qańtar oqıǵasy» boıynsha tergeý amaldaryn júrgizip, bul qandy oqıǵany uıymdastyrýshylar men jazyqtylardy anyqtap jatqanyn atap ótti.
Onyń paıymynsha, atalǵan qarardyń bastamashylary qazaqstandyq beıbit azamattar men quqyq qorǵaý qurylymdaryna kúsh kórsetken jaýapty qarýly lańkesterdiń qylmysy týraly burmalanǵan túsinik alyp otyr.
Budan buryn habarlanǵandaı, Qazaqstannyń Syrtqy ister mınıstrligi Eýroparlamenttiń elimizdegi jaǵdaıǵa qatysty qabyldaǵan qarary birjaqty sıpatqa ıe ekenin jáne obektıvti emes tujyrymdarǵa negizdelgenin málimdedi. https://kaz.inform.kz/news/sim-europarlamenttin-elimizdegi-zhagdayga-katysty-kabyldagan-kararyn-birzhakty-dep-sanaydy_a3888862
