Muhtar Áýezovtiń «Qaragóz» tragedııasynyń stsenarııimen fılm túsirilýi múmkin

ASTANA. KAZINFORM – Muhtar Áýezovtiń pesasy negizinde jazylǵan «Qaragóz» kınojobasy Ulttyq kınony qoldaý memlekettik ortalyǵy ótkizip jatqan konkýrstyń ekinshi kezeńine ótken. Bul jaıynda Mádenıet jáne aqparat mınıstrligi Kazinform saýalyna joldaǵan jaýabynda málim etti.

- Ulttyq kınony qoldaý memlekettik ortalyǵy jarııalaǵan konkýrstyń ekinshi kezeńine iriktelgen jobalardyń qatarynda jazýshy Muhtar Áýezovtiń pesasy negizinde jazylǵan «Qaragóz» kınojobasy bar. Alaıda, bul - joba óndiriske jiberiledi degen sóz emes. Sebebi atalǵan joba qoldanystaǵy zańnamaǵa sáıkes irikteledi. Joba ekinshi kezeńnen sátti ótken jaǵdaıda, tikeleı efır arqyly ótetin pıtchıngke, ıaǵnı ashyq qorǵaýǵa jiberiledi. Ortalyq pıtchıngtegi Saraptama keńesiniń qorytyndysyn vedomstvoaralyq komıssııanyń qaraýyna engizedi. Konkýrstyq irikteýdiń nátıjesi boıynsha mınıstrlik kınojobalardy qarjylandyrý týraly túpkilikti sheshimdi qabyldaıdy, - dep jazylǵan jaýapta.

Aıta ketý kerek, Muhtar Áýzeovtiń «Qaragóz» tragedııasy – qan jaqyndyǵy jeti atadan aspaıtyn Syrym men Qaragózdiń arasyndaǵy sezim azaby týraly týyndy.

Eske salsaq, Mádenıet jáne aqparat mınıstrligi belgili jazýshy Muhtar Maǵaýınniń «Tazynyń ólimi» atty áńgimesiniń jelisimen kórkem fılm túsirý úshin stsenarıı irikteý jumystaryn bastady.