Muhtar Áýezovtiń stýdenttik shaǵyndaǵy qujattary tabyldy
ASTANA. 5 jeltoqsan. QazAqparat - Uly jazýshy Muhtar Áýezovtiń 1923-1928 jyldary Lenıngrad memlekettik ýnıversıtetinde oqyǵan stýdenttik shaǵyndaǵy qujattar tabyldy.
Úlken oljany M.Áýezov atyndaǵy Ádebıet jáne óner ınstıtýtynyń ǵalymdary tapty. Jýyrda Sankt-Peterbýrgke barǵan arnaıy sapardan olar Áýezovke qatysty 72 bet materıal ákeldi. Sondaı-aq, onyń jaryna qatysty 24 bet qujat, Jambyldyń buryn-sońdy beımálim bolyp kelgen 3 kitaby men «Qozy Kórpesh -Baıan sulý» jyrynyń ózbek tilindegi kóshirmesin de ala keldi.
Otandyq ǵalymdardyń Áýezovtiń jastyq shaǵy ótken qazirgi Sankt-Peterbýrgke barýy teginnen tegin emes. Óıtkeni 1997 jyly uly jazýshynyń 100 jyldyǵyna oraı ómiri men shyǵarmashylyǵyna qatysty 50 tomdyǵy shyǵady. Onda jas Muhtardyń stýdenttik ómir tarıhy jutań beriledi. Tek qoljazba túrindegi Lenıngrad ýnıversıtetine qatysty 4 maqalasy ǵana kiredi. Sondyqtan da, bul sapar maqsaty - osy olqylyqtyń ornyn toltyrý edi, deıdi zertteýshiler.
Ulttyq qundylyqtardy qunttap, mádenı muramyzdy tolyqtyrý maqsatyndaǵy zertteý barysynda Sankt-Peterbýrgtiń Ulttyq memlekettik kitaphanasynan Jambyldyń bizge beımálim 3 kitaby tabyldy. Bul jınaqtarda jyr alybynyń Lenın, Stalındi madaqtaǵan jyrlary men «Lenıngradtyq órenderim» atty áıgili óleńi basylǵan, dep habarlaıdy «Qazaqstan» telearnasy.
