Muhtar Áýezovtiń 125 jyldyǵy: Qazaq radıosynan «Abaı joly» roman-epopeıasynyń aýdıonusqasy beriledi
Aýdıokitap formatyndaǵy habar naýryz aıynda bastalyp, qyrkúıek aıyna deıin jalǵasady. Bul týraly «Qazaq radıolary» JShS Bas redkatory- «Qazaq radıosy» radıoarnasynyń dırektory Dýlat Abıbýllaev facebook jelisindegi paraqshasynda jazdy.
«Uly prozaık Muhtar Áýezovtiń dúnıege kelgenine bıyl 125 jyl. Osyǵan
oraı tyńdaýshylarǵa 2 naýryzdan bastap «Abaı joly» roman-epopeıasyn usynamyz. «Kókjıek» habary aptasyna 7 kún, saǵat 21.00 de efırge shyǵady.
Kitapty Qazaq radıosynyń belgili dıktory Amanjan Serikov dybystaǵan»,- dep atap ótken radıoarna basshysy óz jazbasynda.
«Abaı joly» epopeıasy Muhtar Áýezovtiń álemge áıgili tarıhı romandar toptamasy, qazaq halqynyń tuńǵysh epopeıasy. Ol 1942 jyl men 1956 jyldar aralyǵynda jazylyp, jaryqqa shyqty. Epopeıanyń «Abaı» atanǵan alǵashqy eki kitabyna KSRO Memlekettik syılyǵy (1949), «Abaı jolynyń» tutas tórt tomyna Lenındik syılyq (1959) berilgen.
Aıta ketý kerek, buǵan deıin Qazaq radıosynyń efırinen Táýelsizdiktiń 30 jyldyǵyna oraı Іlııas Esenberlınniń «Kóshpendiler» trılogııasynyń aýdıonusqasy, sondaı-aq, Tahaýı Ahtanovtyń «Boran», Hamza Esenjanovtyń «Aqjaıyq»; jazýshy Ázilhan Nurshaıyqovtyń «Mahabbat, qyzyq mol jyldar» romandary men Prezıdent oqýǵa usynǵan kitaptar tizimindegi Júsipbek Aımaýytovtyń «Aq bilek»; Ábish Kekilbaevtyń «Úrker»; Qalıhan Ysqaqtyń «Qońyr kúz edi»; Sáken Júnisovtiń «Aqan seri»; Berdibek Soqpaqbaevtyń «Meniń atym Qoja»; Sábıt Muqanovtyń «Balýan Sholaq»; Sherhan Murtazanyń «Beseýdiń haty»; Muhtar Maǵaýınniń «Bir atanyń balalary» eńbekteri men T. Álimqulovtiń áńgimeleri de aýdıokitap formatynda áýe tolqynynan berilgen.
