Muhtar Áýezov jazyp alǵan qyrǵyzdyń "Manas" jyrynyń qoljazbasy jeke kitap bolyp shyqty

"Qazaq pen qyrǵyzdyń jańa jaǵdaıynda, ortalyqazııalyq yntymaqtastyǵymyz qajet kezinde bul kitaptyń shyqqanyn QR Tuńǵysh Prezıdenti qorynyń tarapynan jasalǵan úlken azamattyq sanaly is boldy dep bilemin", - dedi mádenıettanýshy Murat Muhtaruly Áýezov búgin Almatyda qoljazbanyń tusaýkeser rásiminde.

"Manas" dúnıejúzi moıyndaǵan eń iri jáne birden-bir tiri epos. Mıllıon joly bar bul shyǵarmany Muhtar Áýezov 1952 jyly "bul halyqtyń eposy" dep qorǵap qalǵan. Muhtar Áýezovtyń mashınkamen basylǵan qoljazbasyn QR Tuńǵysh Prezıdenti qoryna Marklen Buzurbaev tartý etken. Ol ony óziniń ákesi, ataqty qazaq jýrnalısi Ǵarıfolla Buzurbaevtyń muraǵatynan taýyp alǵan", - deıdi Murat Áýezov.

Mádenıettanýshy ǵalymnyń aıtýynsha, qoljazba buǵan deıin Muhtar Áýezovtyń 50 tomdyq shyǵarmalary jınaǵynyń 10-tomyna engizilgen bolatyn. Al jeke kitap retinde alǵash ret jaryq kórip otyr.