«Muhtar Áýezov - Trıýmfator tragedııasy» atty derekti fılminiń tusaýkeseri ótti
ALMATY. 2 naýryz. QazAqparat /Áıgerim Ámir/ - Búgin Almatydaǵy «Tsezar» kınoteatrynda «Qazaqstannyń jańa derekti fılmderi» festıvali aıasynda «Muhtar Áýezov - Trıýmfator tragedııasy» atty derekti fılmi kórsetildi.
Fılm qazaqtyń uly jazýshysy M.Áýezovtyń taǵdyry, shyǵarmashylyǵy jaıly, sonymen qatar baspasóz betinde, telearnalarda jıi aıtyla bermeıtin jazýshynyń Lenıngrad qalasynda oqyǵan kezindegi ómiri, eńbegi týraly baıandaıdy. Fılmdi Nıkolaı Anastasev júrgizip otyrady.
«Bul fılm men úshin erekshe týyndylarymnyń biri. Bir kúni men N.A.Anastasevtyń «Trıýmfator tragedııasy» atty kitabyn oqydym. Osy kitapty oqyp otyryp úlken áser aldym. Kitap tamasha tilmen jazylǵan. Onyń mazmuny da tamasha. Men bul kitaptan erekshe áser alǵanym sonshalyq, mınıstr Muhtar Qul-Muhammedke qońyraý shalyp, fılm túsirý týraly oıymdy aıttym. Mine, búgin endi sol eńbektiń baǵasyn ózderińiz berersizder. Taǵy bir aıta ketetini, atalmysh fılm bas keńesshi Murat Áýezovtyń kómeginsiz ótken joq. Men Murat Muhtarulyna rahmetimdi aıtam», - dedi fılm rejıssery Aleksandr Golovınskıı.
