Muhtar Áýezov shyǵarmalarynyń 50 tomdyq akademııalyq basylymy jaryq kórdi
ALMATY. 28 qyrkúıek. QazAqparat /Erbol Azanbek/ - Búgin Almatyda Muhtar Áýezov shyǵarmalarynyń 50 tomdyq akademııalyq basylymynyń tanystyrylymy ótti.
1997 jyly jazýshynyń 100 jyldyq mereıtoıy qarsańynda QR Úkimeti qaýlysymen 50 tomdyq akademııalyq eńbegin basyp shyǵarý qolǵa alynǵan bolatyn. Sol jyly kitaptyń 1-11-shi tomdary «Ǵylym» baspasynan shyqqan edi. Qalǵan 12-50-shi tomdaryn shyǵarý 2003 jyldan bastalǵan. Jaqynda «Jibek joly» baspasynan sońǵy 50-shi tomy jaryq kórip, búgin oqyrmanǵa jol tartty. Bul akademııalyq basylymda M.Áýezovtyń 1917- 1961 jyldary aralyǵynda jazylǵan maqala, áńgimeleri, pesalary men aýdarmalary, oqýshy qaýymǵa belgisiz bolyp kelgen týyndylary, sóılegen sózderi men baıandamalary, pikir, hattary berilgen.
«Elý tomdyqtyń mazmuny, mańyzy, aýqymy, áleýmettik salmaǵy jaǵynan qazaqtyń mádenıeti men kórkemdik álemin belgili bir beleske kótergen qubylys retinde baǵalaýǵa bolady. Osy eńbekterden qalamgerdiń oıshyldyq qarymy, shyǵarmashylyq ustanymy, qoǵamdyq, ulttyq, rýhanı-mádenı máselelerge degen kózqarasy aıqyn kórinedi. Bul 50 tomdyq buryn jaryq kórgen 20 tomdyqta joq jańa dúnıelermen tolyqty. Buǵan deıin qazaqta 50 tomdyq akademııalyq basylymy jaryq kórgen adam bolǵan emes. Sondyqtan atalǵan elý tomdyqtyń orny erekshe»,- deıdi M.Áýezov atyndaǵy Ádebıet jáne óner ınstıtýtynyń dırektory, akademık Seıit Qasqabasov.
Eske sala keteıik, búgin zańǵar jazýshynyń týǵan kúni. Bul kúnge oraı búgin Almatydaǵy M.Áýezov eskertkishine gúl qoıylyp, atalǵan elý tomdyqtyń tanystyrylymy ótti.
