Muhtar Áýezov atyndaǵy drama teatrynyń repertýary jańa qoıylymmen tolyqty
ALMATY. 9 aqpan. QazAqparat - Jahandaný jaǵdaıynda qazaqtyń búgingi otbasylary, bizben úzeńgilesip qatar júrgen jastary qalaı ómir súrip jatyr degen biraz saýaldarǵa osy spektakl jaýap beredi-aý dep oılaımyn.
Aqyn, dramatýrg Nurlan Orazalın Almatydaǵy Muhtar Áýezov atyndaǵy qazaq memlekettik akademııalyq drama teatrynda QR eńbek sińirgen qaıratkeri Nurqanat Jaqypbaıdyń rejısserligimen sahnalanǵan «Shyraq janǵan tún» lırıkalyq dramasynyń tusaýkeserinde osyndaı pikir bildirdi.
«Zaman talabyn, ýaqyttyń ereksheligin eskerip, qoǵamdaǵy shyndyqtardy qamtyp, kórermendi tartýdyń joldaryn izdedik. Negizgi sıýjet, kompozıtsııa, oqıǵa burynǵy qalpynda saqtaldy. Jalpy mahabbat - máńgi taqyryp. Otbasyndaǵy túrli oqıǵalar, qoǵamdaǵy teńsizdik, ádiletsizdik munyń bári ómirde bolatyn nárse. Al jahandaný jaǵdaıynda qazaqtyń búgingi otbasylary, bizben úzeńgilesip qatar júrgen jastary qandaı ómir súrip jatyr degen biraz saýaldarǵa osy spektakl jaýap beredi-aý dep oılaımyn», - deıdi qoıylym rejısseri. Avtordyń aıtýynsha, shyǵarma jelisi bas keıipker Nurgúldiń aınalasynda órilgen.
1976 jyly jazylǵan bul drama alǵash qazirgi Ǵabıt Músirepov atyndaǵy memlekettik balalar men jasóspirimder teatrynda 1977 jyly sahnalandy. Alǵashqy rejısseri Venıamın Kım bolǵan. Odan keıin elimizde ǵana emes, kórshiles elderdiń teatrlarynda da qoıylǵan edi. Endi birshama úzilisten keıin qaıta sahnalanyp otyr.
