Muhtar Áýezov atyndaǵy teatrdy jańǵyrtý jobasy qaı satyda
ALMATY. KAZINFORM – Muhtar Áýezov atyndaǵy Qazaq ulttyq drama teatry ǵımaratynyń jaı-kúıi kóptegen almatylyqtardy alańdatyp otyr. Osyǵan oraı Kazinform agenttigi nysandaǵy jóndeý jumystary qashan aıaqtalatynyn anyqtap kórdi.
Almatynyń basty mádenı nysandarynyń birinde aýqymdy rekonstrýktsııa júrgizilip jatyr. Ǵımaratty jańartý jumystary 2024 jyldyń sońynda bastaldy. Nysan salynǵan 1981 jyldan beri alǵash ret kúrdeli jóndeýden ótip jatyr.
40 jyldan astam ýaqyt ishinde ǵımarattyń ınjenerlik jelileri men materıaldyq-tehnıkalyq bazasy ábden tozǵan. Ásirese, órt qaýipsizdigi jaǵynan úlken qater boldy. Sondyqtan ǵımarattyń tarıhı sáýlettik beınesin saqtaı otyryp, tolyqtaı jańartý týraly sheshim qabyldanǵan.
Mamyr aıynyń basynda agenttiktiń fototilshisi teatrǵa arnaıy baryp, onyń qazirgi keıpin kamera obektıvine túsirip aldy. Búginde nysan aýmaǵy bıik qorshaýmen qorshalǵan. Onyń syrtynda teatrdyń sýreti men «100 jyl» degen jazýy bar bannerler ilingen. Eske salaıyq, bıyl teatr óziniń ǵasyrlyq mereıtoıyn atap ótedi.
Alaıda ǵımaraattyń qasbetine baılanysty qala turǵyndarynyń arasynda túsinbeýshilik pen túrli suraqtar týyndap júr. Sebebi nysan syrtynan qaraǵanda jumysshylar kórinbeıdi, qasbet qaptamasvnyń edáýir bóligi alynyp tastalǵan, al ǵımarattyń ózi qaraýsyz qalǵandaı áser qaldyrady.
Merdiger men bólingen qarjy belgili me
Teatrdyń bolashaǵyna qatysty mán-jaıdy bilý úshin redaktsııa QR Mádenıet jáne aqparat mınıstrligine saýal joldady. Oǵan Mádenıet komıtetiniń tóraǵasy Erlan Dákenov jaýap berdi.
Onyń aıtýynsha, jobanyń merdigeri — elimizdegi iri qurylys kompanııalarynyń biri. Merdigerdi tańdaý jáne rekonstrýktsııanyń barlyq kezeńderin júzege asyrý qoldanystaǵy zańnamaǵa saı júrgizilip jatyr.
Teatrdy kúrdeli jóndeýge bıýdjetten qansha qarajat bólingeni resmı jarııalanǵan joq. Buǵan deıin qoǵam belsendileri mıllıon men mıllıardtar arasynda túrli boljam aıtqan bolatyn. Mádenıet komıteti ǵımaratty jańartýǵa jumsalatyn qarjy týraly aqparatty jáne qyzmet berýshini anyqtaý týraly málimetti berilmeıtinin túsindirdi. Bul «Quqyqtyq aktiler týraly» Zańnyń 26-baby 8-tarmaǵyna sáıkes, baspasózde jarııalanbaǵan Úkimettiń 2024 jylǵy 21 mamyrdaǵy, 27 qyrkúıektegi jáne 2026 jylǵy 20 naýryzdaǵy qaýlylaryna baılanysty.
Qurylys toqtap tur ma
Komıtet tóraǵasy teatrda syrt kózge eshkim joq bolyp kóringenimen, qurylys-montajdaý jumystarynyń júrip jatqanyn aıtty. Onyń sózinshe, alańda ınjenerler, qurylysshylar jumys istep júr. Jumysshylar sany atqarylatyn jumystyń kólemine qaraı ózgerip otyrady. 2026 jyldyń basynda Mádenıet jáne aqparat mınıstrligi M.Áýezov atyndaǵy teatrda jańǵyrtý jumystary toqtady degen aqparatty joqqa shyǵardy.
Qazirgi tańda nysanda tirek konstrýktsııalary nyǵaıtylǵan jáne shatyryn ornatý jumystary júrip jatyr. Sondaı-aq ınjenerlik jáne mýltımedııalyq jabdyqtardyń bir bóligi satyp alynǵan.
— Teatr sııaqty mańyzdy nysandy qaıta jańǵyrtý erekshe tásil men egjeı-tegjeıli zertteýdi qajet etedi. Bul sáýlet eskertkishi ári mádenı mura nysany bolǵandyqtan, tarıhı qundylyǵyna nuqsan keltirmeý úshin asyǵystyqqa jol berilmeıdi. Sondyqtan jumystar kestege saı júrgizilip jatyr, al nysandy osy jyldyń sońyna deıin paıdalanýǵa berý josparlanǵan, — dedi vedomstvo ókili.
Jalpy joba ishki jáne syrtqy jumystardy qamtıdy. Atap aıtqanda, ǵımarattyń tarıhı beınesin saqtaı otyryp, qasbetin tolyq jańartý kózdelgen. Qaptaý úshin 1980-jyldary qoldanylǵan karerdiń tastary paıdalanylady. Sonymen qatar ınjenerlik kommýnıkatsııalar almastyrylyp, irgeles aýmaq abattandyrylady jáne sahnalyq jabdyqtar álemdik standarttarǵa saı jańartylady.
Eske salaıyq, 2020 jyly Áýezov teatryna «Ulttyq» mártebesi berildi.
