Muhtar Altynbaev: Jumysshylarǵa áskerı kıimdi kııýge tyıym salý kerek
ASTANA. QazAqparat - Jumysshylarǵa áskerı kıimdi kııýge tyıym salý kerek. Bul týraly búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda depýtat Muhtar Altynbaev málim etti, dep habarlaıdy QazAqparat.
Senator óz sózinde áskerılermen kezdesý barysynda aıtylǵan keıbir máselelerge toqtaldy.
«Sarbazdardyń kıimderin, ıaǵnı kamýflıaj kıimderdi áskerı salada istemeıtin adamdardyń kıgeni durys emestigi týraly másele kóterildi. Bul taqyryp burynnan beri talqylanyp keledi. Alda EKSPO kele jatyr. Qala kóshelerinde aýla sypyrýshylary, kúzetshiler jáne basqa jumysshylar ary qaraı da áskerıler kıimimen júre berse, onda shetelden kelgen meımandar ásker qataryndaǵy sarbazdar kóshe tazalap júr degen oıǵa kelýi múmkin»,-dep toqtaldy M. Altynbaev.
Onyń pikirinshe, áskerı kıimdi osy salada qyzmet etetinder ǵana kıgeni durys, al qalǵandaryna tıisti shekteý bolýy tıis.
Óz kezeginde depýtat Darıǵa Nazarbaeva áskerı kıimder kóbinese yńǵaıly ári jyly bolǵandyqtan, adamdar ony satyp alatynyn atap ótti. «Dál osy matamen jáne sapamen ózge tús túrlerin irikteı otyryp, áskerı emes adamdarǵa arnalǵan mundaı kıimderdi tigýdiń basqa jelisin qurýdy oılastyrý kerek shyǵar. Sondyqtan dalada kóp jumys isteıtin adamdar úshin arnaıy jyly kıimderdi tigýdi qarastyrǵan jón bolar»,-dedi D. Nazarbaeva.
