Muhtar Altynbaev ushý qaýipsizdigin qadaǵalaıtyn organ qurýdy usyndy
ASTANA. QazAqparat - QR Úkimeti janynan ushý qaýipsizdigin qadaǵalaıtyn derbes memlekettik organ qurý kerek.
Bul jaıynda QR Premer-Mınıstri Baqytjan Saǵyntaevtyń atyna joldanǵan senator Muhtar Altynbaevtyń depýtattyq saýalynda aıtylǵan, dep habarlaıdy QazAqparat.
«Meniń depýtattyq saýal joldaýyma sebep bolyp otyrǵan azamattyq jáne memlekettik avıatsııanyń otandyq salasyndaǵy ushý qaýipsizdigin qamtamasyz etýdiń tıimsiz júıesi bolyp tabylady. Eger statıstıkaǵa mán bersek, 2012-2016 jyldar aralyǵynda Qazaqstanda 30-dan astam áýe apattary men oqys oqıǵalary oryn alyp, 85-ten asa adamnyń ómiri qıyldy, bul sertıfıkattaý men qadaǵalaý rásimderi sapasynyń tómendigin kórsetedi», - dedi Altynbaev.
Senatordyń aıtýynsha, osyǵan baılanysty birinshiden, azamattyq jáne memlekettik avıatsııadaǵy sertıfıkattaý, qadaǵalaý jáne baqylaý jónindegi memlekettik fýnktsııalardy ártúrli memlekettik vedomstvolarǵa qaıta bólý qajet. Ekinshiden, Qazaqstan Respýblıkasynyń Úkimeti janynan ushýdyń qaýipsizdigin qadaǵalaýdy júzege asyratyn jáne avıatsııalyq oqys oqıǵalarǵa tergep-tekserý júrgizetin derbes memlekettik organ qurý kerek. Bul rette bul organnyń qyzmeti azamattyq avıatsııa salasymen ǵana shektelmeýi tıis. Úshinshiden, ushý qaýipsizdigin qamtamasyz etý máselesin birneshe memlekettik qurylymnyń jumysymen baılanysty keshendi mindet retinde qaraý kerek. Ony sheshýdiń joldary osy saladaǵy ǵylymı-zertteý jumystarynyń nátıjelerine, olardy qamtamasyz etý praktıkasyna endirýge de baılanysty.
«Kórsetilgen máselelerdi qaraýyńyzdy jáne qaraý nátıjesi boıynsha zańda belgilengen merzimde jazbasha jaýap berýińizdi suraımyn»,- dedi senator.
