Muhtar Altynbaev kezekten tys saılaý týraly: Ýaqytty ótkizip almaý kerek
«Búgin biz respýblıkalyq Ardagerler uıymynyń keńeıtilgen otyrysyn ótkizdik. Biraýyzdan Prezıdent Qasym-Jomart Toqaevtyń kezekten tys saılaý ótkizý týraly úndeýine qoldaý bildirdik. Jalpy, bunyń durys sheshim ekenine qatysty oıymyz bir jerden shyqty. Sebebi, Tuńǵysh Prezıdent - Elbasy qoıǵan aýqymdy mindetter men baǵdarlamalar birshama jumystardy atqarý kerektigin bildiredi. Sol sebepti, ýaqyt sozýdyń qajeti joq. Jańa kelgen Prezıdent ómir sapasyn arttyrýǵa, qaýipsizdik pen turaqtylyqqaq qatysty jalpy memlekettiń alǵa qoıǵan maqsattary men mindetterin oryndaýy kerek», - deıdi Muhtar Altynbaev Ardagerler uıymynyń keńeıtilgen otyrysynan keıin tilshilerge.
Armııa generaly óz sózinde elimiz táýelsizdigin alǵannan keıin armııanyń qurylymy nólden bastalǵanyn eske aldy.
«Kadrǵa qatysty problemlar boldy. Shekarany shegendeýde qaýipsizdik máselesi alǵy shepte tur edi. Qarýly Kúshter alǵash qurylǵan kezde álbette, eskirip qalǵan qarýlar bizdiń elimizde boldy. Qarýlardy saqtap qalý kerek edi. Al ıadrolyq qarýlardyń eshkimge opa bermeıtini belgili. Sondyqtan, Bas qolbasshy Nursultan Nazarbaev ıadrolyq qarýlardan bas tartý týraly sheshim qabyldaǵanyn bilesizder. Sol kezeńde bul óte ońaı sheshim emes edi. Qarýly kúshter qazir aıaǵyna nyq turdy, kásibı daıarlyǵy da joǵary. Bitimgerlikpen shette júrgen bólimshelerimiz bar. Bir sózben, armııa búgingi tańda ábden turaqtaldy», - deıdi Muhtar Altynbaev.
Eske sala ketsek, aǵymdaǵy jyldyń 9 maýsymynda elimizde kezekten tys prezıdenttik saılaý ótedi. Bul týraly respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty.
Memleket basshysy Qasym-Jomart Toqaevtyń respýblıkalyq telearnalar arqyly Qazaqstan halqyna joldaǵan úndeýiniń tolyq mátinin myna siltemeden oqýǵa bolady.
