Muhtar Ábilıazov pen onyń sybaılastarynyń isi boıynsha taraptardyń sóz saıysy 23 mamyrda ótedi
ASTANA. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynyń sýdıasy Martbek Kákimjanov sot tergeýiniń aıaqtalǵanyn habarlady. Taraptardyń sóz saıysy aǵymdaǵy jyldyń 23 mamyryna belgilendi.
Aıta ketelik, «BTA bank isi» boıynsha basty sot otyrysy aǵymdaǵy jyldyń 3-shi sáýirinde bastaldy jáne ol ashyq jaǵdaıda ótýde. Sottalýshylar oryndyǵynda syrttaı sottalatyn M. Ábilázovten bólek onyń úsh sybaılasy - «BTA bankiniń» basqarma tóraǵasynyń eks-birinshi orynbasary-nesıe berý komıtetiniń tóraǵasy Jaqsylyq Jarymbetov, nesıeleý boıynsha eks-dırektor Qaırat Sadyqov jáne «BTA bankiniń» burynǵy basqarma tóraǵasy Sadýaqas Mámesh otyr. Olardyń barlyǵy asa iri kólemdegi BTA banktiń aqshasyn urlady dep aıyptalýda. Muhtar Ábilıazovke Qylmystyq Kodekstiń 6 baby boıynsha: qylmystyq qaýymdastyq qurdy jáne oǵan basshylyq etti, BTA banktiń aqshasyn jymqyrdy jáne ony zańdastyrdy, banktiń qarajatyn zańsyz paıdalandy jáne ókilettikterin asyra paıdalandy degen aıyptar taǵylýda.
Sot otyrysy basty aıyptalýshy Muhtar Ábilıazovtiń qatysýynsyz ótip jatyr. Eks-bankır 2009 jyldan qashyp júr, ol qazirgi kezde Frantsııada turady. Al sotta qashqyn bankırdiń múddesin memleket taǵaıyndaǵan qorǵaýshy Anjela Ájiǵulova qorǵaýda. Alǵashqy sot otyrysynda-aq sottalýshylar men qorǵaýshylardyń eshqaısysy qylmystyq isti bas fıgýranttyń qatysýynsyz qaraýǵa qarsylyq bildirgen joq.
Keltirilgen shyǵynnyń jalpy kólemi 7,5 mlrd. AQSh dollarynan asady. Bankten urlanǵan qarajat halyqtyń zeınetaqy salymdary, Qazaqstan azamattarynyń jeke salymdary jáne sheteldik qarjy ınstıtýttarynyń qaryz aqshasy.
Urlanǵan kýágerler
Aıta ketelik, sotqa túsinik bergen kýágerlerdiń sózinen baıqalǵandaı, BTA bankte basshylyq qurylymdarda jumys istegen qyzmetkerlerge Ábilıazovtiń senimdi ókilderiniń tarapynan únemi qaýip tóngen. Ábilıazovtiń mańaıyndaǵy adamdar tergeýden jasyrý maqsatymen BTA banktiń qyzmetkerlerin urlap, shetel asyrǵan. Alaıda, keıbir qyzmetkerler óz erikterimen Qazaqstanǵa oraldy. Kóbinese olar Bishkek, Máskeý jáne Kıev qalalaryn panalaǵan.
Belgili bir kezeńde Ábilıazov qashqyndarǵa aqshalaı kómek bergen, sondaı-aq qorǵaýshylarmen qamtamasyz etip, turaqty túrde nusqaý berip otyrǵan. Biraq Ábilıazovtyń qoldaýy toqtaǵan kezde BTA bank qyzmetkerleriniń kópshiligi Qazaqstanǵa qaıtyp oralyp, tergeý organdaryna járdem berdi. Olar sotta BTA banktegi aqsha urlaýdyń qylmystyq kestesi týraly egjeı-tegjeıli áńgimelep berdi.
Barlyq kýágerler sottaǵy jaýabynda M. Ábilıazovtiń arnaıy nusqaýymen qurylǵan №6 korporatıvtik bıznes basqarmasynyń qyzmeti týraly ashyq áńgimeledi. Óıtkeni banktiń osy bólimshesi Brıtan Vırgın jáne Seıshel araldarynda tirkelgen rezıdent emes kompanııalardyń qujattaryn daıyndaǵan. Saıyp kelgende, atalǵan offshorlyq kompanııalardyń jetekshileriniń atynan BTA bankke kóp mıllıardtaǵan nesıelerge ótinim berilgeni málim boldy.
Atap aıtarlyǵy, nesıe komıtetiniń qyzmetkerleri atalǵan kompanııalardyń kimge baǵynatynyn jaqsy bilgen. Sol sebepten kelgen ótinimderdi jedel maquldap otyrǵan. Buǵan qosa, «bir kúndik» kompanııalardyń nesıelik tarıhy, kepilge qoıatyn múlki, qandaı da bir saladaǵy jumys tájirıbesi bolmaǵan.
