Muhtar Ábilıazov pen onyń sybaılastaryna qatysty sotqa deıingi tergeý aıaqtaldy
ASTANA. QazAqparat - Sybaılas jemqorlyqqa qarsy is-qımyl Ulttyq bıýrosy BTA Bankindegi qarajattyń jymqyrylýy týraly qylmystyq isti sotqa deıingi tergeýdi aıaqtady jáne is materıaldarymen tanysýdyń bastalǵany jarııalandy, dep habarlady vedomstvonyń baspasóz qyzmeti.
Aldyn ala tergeý jan-jaqty, tolyq jáne ádil júrgizildi, dáleldeýge jatatyn barlyq mán-jaılar anyqtaldy.
Jınalǵan aıǵaqtar negizinde BTA bankiniń burynǵy basshylary - Qazaqstannan tys jerde júrgen M.K.Ábilıazovtyń (dırektorlar keńesiniń tóraǵasy), J.D.Jarymbetovtyń (basqarma tóraǵasynyń birinshi orynbasary - nesıeleý komıtetiniń tóraǵasy), K.A.Sadyqovtyń (nesıeleý boıynsha dırektor) jáne S.H.Mámeshtiń (basqarma tóraǵasy) qylmystyq is-áreketteriniń deńgeıi anyqtaldy.
Atap aıtqanda, Ábilıazovke qylmystyq top qurdy jáne jetekshilik etti, BTA Bankiniń aqshalaı qarajatyn jymqyrdy jáne óz laýazymyn asyra paıdalanyp, bank qarajatyn zańsyz jaratty degen kúdik taǵyldy.
Keltirilgen shyǵynnyń jalpy somasy 7,5 mlrd. AQSh dollaryn qurady.
Tergeý toby jymqyrylǵan qarajattyń Qazaqstan halqynyń nesıelik salymdarynan, azamattardyń jeke jınaqtarynan jáne sheteldik qarjy ınstıtýttarynyń qaryzdarynan quralǵanyn rastady.
Sonymen birge, memleket BTA Bankiniń qaryzdaryn óteý boıynsha barlyq mindetti óz moınyna aldy.
