Muhtar Ábilıazov óziniń qyzmetkerlerin qalaı «paıdalandy»
ASTANA. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilıazov pen onyń sybaılastaryna qatysty qylmystyq isti qaraý odan ári jalǵasýda. Sottyń búgingi otyrysynda prokýrorlar BTA banktiń qyzmetkerleriniń atyna tirkelgen offshorlyq kompanııalardy nesıeleýge qatysty qylmystyq áreketter sulbasyn jarııa etti.
BTA banktegi zańsyz aıla-sharǵylar, negizinen alǵanda, tikeleı banktiń dırektorlar keńesiniń tóraǵasy Muhtar Ábilıazovtyń óz qolymen jasalǵan stsenarıı boıynsha júzege asyrylǵan. Atap aıtqanda, 2007 jyly bank basshylyǵynyń tikeleı nusqaýymen «Lıter M» jaýapkershiligi shekteýli seriktestigi qurylady. Bul kompanııa aktsııalarynyń bir paıyzdyq úlesi №6 korporatıvtik bıznes basqarmasynyń zańgeri Maksım Hablovtyń atyna tirkeledi. Atap aıtarlyǵy, kýágerlerdiń sotta jarııa etkenindeı, birneshe mıllıondaǵan nesıeler eshqandaı kedergisiz berilip otyrǵan rezıdent bolyp tabylmaıtyn kompanııalardy tirkeýmen osy basqarma aınalysqan. Saıyp kelgende, Maksım Hablov jańadan qurylǵan kompanııanyń dırektory bolyp kórsetilgen.
Al, «Lıter M» jaýapkershiligi shekteýli seriktestiginiń qalǵan 99 paıyzdyq aktsııasynyń úlesi Seıshel araldarynda tirkelgen «Steiman Corp» kompanııasyna tıesili bolǵan. Aıta keterligi, offshorlyq kompanııanyń múddesin Qazaqstanda senimhatpen qorǵaý №6 korporatıvtik bıznes basqarmasynyń qyzmetkeri Eleonora Sergoǵa júkteledi. Alaıda, BTA banktiń nesıe berý bóliminiń qyzmetkerleriniń eshqaısysy mundaı «bir kúndik» offshorlyq kompanııalardyń qojaıyndaryn ómirde kórmegen.
«2007 jyldyń shilde aıynda Maksım Hablov BTA bankke 20,5 mıllıon AQSh dollary kóleminde nesıe berýge ótinish jazady. Nesıe alýdaǵy negizgi maqsat retinde aınalymdaǵy qarajattyń qoryn tolyqtyrý dep kórsetedi»,- dep áńgimeledi sot otyrysynda BTA banktiń ókili Talǵat Amantaı. Bul joly da ádettegideı eshqandaı qajetti taldaýlar jasalmastan, ótinish qanaǵattandyrylady. Tikeleı Muhtar Ábilıazovtiń baqylaýyndaǵy nesıe komıteti turaqty nesıelik qujattardyń jáne tıisti múliktik kepildiń joqtyǵyna qaramastan, mundaı nesıelik ótinishterdi maquldap otyrǵan. Bul joly solaı bolǵan. Bastysy, «aınalymdaǵy qarajatty tolyqtyrýǵa» dep berilgen nesıelerdiń eshqaısysy bankke qaıtarylmaǵan.
«Arada eki aı ýaqyt ótkende «Lıter M» JShS-niń qarjylandyrý shegi 22,5 mıllıon AQSh dollaryna deıin kóbeıtilgen. Buǵan kepil retinde «Montajınjınırıng» jaýapkershiligi shekteýli seriktestiginiń jarǵylyq qorynyń 75 paıyzdyq úlesi qoıylýy kerek bolǵan»,- dep jalǵastyrdy sózin Talǵat Amantaı. Túptep kelgende, «Montajınjınırıng» jaýapkershiligi shekteýli seriktestiginiń jarǵylyq qorynyń 75 paıyzdyq úlesin M. Ábilıazovtyń baqylaýyndaǵy «Lıter I» jaýapkershiligi shekteýli seriktestigi ózine menshikteıdi. Sońǵy kompanııa M. Ábilıazovtyń kúzetshisiniń atyna tirkeledi. Bul jerde «Montajınjınırıngtiń» Almaty qalasyndaǵy Abaı jáne Fýrmanov kósheleriniń qıylysyndaǵy quny qymbat jyljymaıtyn múlik kepilge qoıylýy tıis bolǵan.
Alaıda, saıyp kelgende ne «Lıter M» JShS-iniń, ne «Lıter I» JShS-iniń tarapynan BTA bankke eshqandaı kepildik qoıylmaǵan. Bankten berilgen nesıe qaıtarylmaǵan, tipti ony eshkim de qaıtarýǵa nıet tanytpaǵan.
«Stroıgrýpp LTD» jaýapkershiligi shekteýli seriktestigine de osyndaı kestemen nesıe berilgen. Aıta ketelik, bul kompanııanyń aktsııasynyń 80 paıyzdyq úlesi Muhtar Ábilıazovtiń sybaılastarynyń biri banktiń burynǵy basqarýshy dırektory, sottalýshy Qaırat Sadyqovtyń atyna tirkelipti. Sot otyrysynda sotqa túsinik bergen Sadyqov atalǵan kompanııanyń nomınaldy qojaıyny bolǵanyn, biraq eshqandaı máselelerdi sheshýmen aınalyspaǵanyn aıtty. BTA banktiń nesıe komıteti ótinishti ózi tirkep, «Stroıgrýpp LTD» JShS-ne 45 mıllıon AQSh dollary kólemindegi kepilsiz nesıeni aýdarady. Túptep kelgende, bul nesıe de bankke qaıtarylmaǵan.
